Ensly Emers, propietario di kompania di transporte Emers BV, a eksponé e situashon fèrfelu ku shofùrnan di bus di skol ta pasando aden. Segun Emers, e reto prinsipal ku e sektor ta konfrontá na e momentonan aki ta un kombinashon di un pago ku ta keda demasiado abou i oumento drástiko di kosto di gasoil, faktornan ku ta pone preshon enorme riba e operashon diario di transporte eskolar.

E oumento den kosto di kombustibel i falta di un solushon direkto pa kompensá gastunan aki a krea inkietut serka shofùrnan. Nan ta sinti ku tarifanan aktual no ta reflehá realidat ekonómiko ku nan ta konfrontá nan mes kune tur dia riba kaya.

Advertisement

Apesar di e preokupashon finansiero aki, Emers a indiká ku tin un desaroyo positivo i shofùrnan ta satisfecho ku e punto i proposishonnan ku a logra keda akordá i poné ofisialmente riba papel ku Gobièrnu den un enkuentro. Shofùrnan ta spera ku e akuerdo aki no ta keda simplemente un promesa, sino ku e lo keda kristalisá i ehekutá mas pronto ku ta posibel pa trese e alivio struktural ku nan tin mester.

Na mes momento, Emers a manda un mensahe di trankilidat pa tur kas di famia, skol i studiante, garantisando ku transporte eskolar di e hóbennan lo no keda interumpí ni afektá, i ku e shofùrnan lo sigui kumpli ku nan deber na un manera responsabel miéntras nan ta warda riba e paso i solushonnan final di parti di Gobièrnu di Boneiru.