Sindikato AFBW a hasi un yamada na tur trahadó i pueblo di Boneiru en general pa un manifestashon masal ku lo tuma lugá djasabra awor pa 4or di atardi den kura di AFBW. E mobilisashon aki ta un kontesta direkto riba retonan krítiko ku e sektor di salubridat ta enfrentando aktualmente, enfoká spesialmente riba negosiashonnan di e CAO Zorg, e implementashon di un siman di trabou di 36 ora i retonan struktural rondo di fondonan di penshun.

E siman di trabou di 36 ora ta un di e pilanan mas fundamental di e akshon aki. Norwin Willem a splika ku e akuerdo ku ta riba mesa aktualmente pa pasa di un siman di 40 ora pa 36 ora den e sektor di kuido i ta un paso krusial pa e bienestar i kondishonnan di trabou di e personal.

Segun Willem, e enfoke prinsipal di e kambio aki ta pa pone dignidat i salu di trahadó na promé lugá. E meta no ta solamente pa pèrkurá ku personal por rindi i produsí den forma optimal den nan trabou di tur dia, sino tambe pa garantisá ku nan por disfrutá di tempu di kalidat huntu ku nan famia i den nan bida sosial.

Mas aleu sr Willem a indiká ku e manifestashon ku tin planiá pa djasabra awor 15 di ougùstùs ta pa mustra mundu ku Boneiru ta kla pa kambia historia. E meta prinsipal di e reunion aki den kura di AFBW ta pa logra un asistensia masal pa demostrá unidat di e pueblo den nan deseo pa kambio di oranan di trabou bira un realidat.

Aparte di e kondishonnan di trabou di tur dia, AFBW ta eksigí un solushon urgente i hustu pa e situashon di penshun ku ta afektá trahadónan den sektor di kuido. Lider di sindikato Cherel Kwidama a denunsia abiertamente e eksistensia di diskriminashon den e sistema di penshun aktual.

Pa e motibu aki, e sindikato ta hasi un yamada direkto na dunadónan di trabou, Ministerio di Salubridat, Bienestar i Deporte (VWS), i ministerio konserní, pa nan tuma pasonan nesesario i responsabel sin mas tardansa. E meta ta pa garantisá ku tur trahadó, sin eksepshon, ta risibí e penshun digno ku nan a traha duru p’e i ku nan meresé despues di añanan di servisio.

Presidente di AFBW, Cherel Kwidama, a amplia riba e vishon tras di e manifestashon aki, enfatisando ku e lucha pa bienestar di Boneiru mester wòrdu atendé pa medio di un diálogo konstruktivo ku Hulanda.

Kwidama ta lamentá ku hopi biaha atenshon i energia di e pais ta desviá pa konfliktonan interno i pleitunan sekundario, enbes di enfoká riba retonan struktural grandi ku Boneiru tin ku resolvé konhuntamente ku Hulanda.

Advertisement