Djadumingu 31 di mei, alrededor di 2:00 di mardugá, un persekushon den bario di Tera Kòrá i Nikiboko a tuma lugá despues ku un vehíkulo sospechoso a nenga di para pa kòntròl.

Segun informashon di polis, un patruya a intenta para e vehíkulo riba Kaya Valdivia despues ku a observá ku lusnan di brek no tabata funshoná korektamente. Ademas, e outo tabata moviendo di manera sospechoso riba kaminda.

Na altura di Kaya Valdivia, e vehíkulo a baha velosidat, permitiendo ku dos pasahero a habri porta i trata di kore bai. Sin embargo, e shofùr a sigui kore ku velosidat haltu, obligando polis pa sigui e vehíkulo den diferente kaya den e área.

E persekushon a yega na su fin riba Kaminda Nieuw Amsterdam, serka di Kaya Konfó. Na e lugá ei, un pasahero a baha for di e vehíkulo i a kore bai, mientras ku e shofùr a sigui ku su intento di hui.

Polis a sigui ku un persekushon na pia tras di e sospechoso ku a baha for di e outo. Durante e akshon, polis a los tres tiru. Apesar di esaki, e sospechoso a logra hui i pèrdè den skuridat.

Durante un investigashon den e área, polis a deskubrí un arma di kandela huntu ku munishon. E arma i e munishon a wordu konfiská komo prueba. Mas despues, e vehíkulo envolví den e kaso tambe a wordu lokalisá riba Kaminda Djabou i a keda konfiská pa mas investigashon.

Polis ta sigui ku e investigashon pa determiná tur e sirkunstansianan rondo di e insidente i pa identifiká i lokalisá e sospechosonan envolví.

Advertisement