Stichting Nationale Parken Bonaire (STINAPA) a bati alarma tokante efektonan di e fenómeno klimatológiko 'Super El Niño', ku aktualmente ta den su fase mas ekstenso den region di Karibe.

E aña aki, sistemanan meteorológiko a konfirmá ku nos ta enfrentando un variashon di El Niño sumamente fuerte konosí komo 'Super El Niño', debí na e oumento drástiko di temperatura den oséano Pasífiko ku ta kambia tempu rònt mundu.

Segun STINAPA, e fenómeno aki tin dos konsekuensia prinsipal pa eko sistema teritorial i marítimo di Boneiru. El Niño ta trese un redukshon signifikante den chèns di áwaseru pa region di Karibe. Esaki ta nifiká ku Washington Slagbaai National Park i e áreanan di mondi ta birando sumamente seku. E tempu largu di sekura aki ta oumentá e riesgo pa kandela di mondi, poniendo preshon riba fauna lokal i tambe riba nos lora, prikichi, kabritu i yuananan ku ta den búskeda di kuminda i awa.

E preokupashon mas grandi pa STINAPA ta e subida di temperatura di awa di laman. Esaki por proboká blikiamentu di koral kual ta e proseso kaminda e koralnan ta pèrdè nan koló i por muri masalmente si e kalor persistí. Esaki ta debilitá bida marino i ta afektá e piská i piskadónan ku ta dependé di refnan.

STINAPA ta enfatisá ku den e tempu di krísis klímatiko aki, humanidat tin ku duna un man pa minimalisá e preshon riba naturalesa. Nan ta pidi siudadano i bishitantenan pa no sende kandela por nada i tambe ora ta snòrkel òf sambuyá, pèrkurá pa nò mishi, trompeká òf kousa mas strès na e koralnan ku ya kaba ta sufriendo bou di e awa kayente.

Advertisement