Doñonan partikular di monumentonan ku tin un funshon di bibienda na Boneiru por pidi supsidio pa mantenshon i reparashon di nan propiedat entre 1 i 30 di sèptèmber 2026. E areglo piloto ta destiná pa Boneiru, Sint Eustatius i Saba, ku un presupuesto total di USD 1,1 mion, di kua USD 550.000 ta reservá pa Boneiru.

Pa kada monumento por otorgá un supsidio di entre USD 25.000 i USD 100.000. Edifisionan históriko ku no ta designá ofisialmente komo monumento por bin na remarke, inkluyendo edifisionan den áreanan históriko protehá di Kralendijk i Rincon. E edifisionan akí mester tin mas ku 50 aña di antiguedat i balor históriko, kultural òf arkitektóniko pa Boneiru.

Pa yuda doñonan ku preparashon di nan petishon, tin un kompensashon disponibel pa gastunan manera inspekshondi konstrukshon, deskripshon di trabou i kalkulashon di gastu. E kompensashon ta maksimalmente USD 5.000 pa monumento i ta ser pagá direktamente na konsehero di konstrukshon. Pa esaki tin un fondo total di USD 52.000 disponibel.

Promé ku un petishon ser prepará, e konsehero di konstrukshon lo hasi un evaluashon global di probabilidat ku e petishon lo ser aprobá. Esaki mester yuda evitá gastunan innesesario pa e doño. Den situashon kaminda un doño no por paga e gastunan di preparashon adelantá, Fondo di Restourashon por paga te USD 2.500 direktamente na e konsehero di konstrukshon.

Ta enfatisá ku doñonan no mester kuminsá ku trabounan di mantenshon òf reparashon promé ku a tuma un desishon tokante e petishon di supsidio. Trabounan ku a kuminsá kaba òf ku a ser finalisá promé ku aprobashon no lo kualifiká pa supsidio.

Rijksdienst voor het Cultureel Erfgoed (RCE) lo trata e petishonnan i ta spera di tuma un desishon no mas lat ku fin di febrüari 2027. Despues ku otorgá e supsidio, e doño lo tin dos aña di tempu pa ehekutá e trabounan aprobá.

Doñonan interesá ta wòrdu enkourashá pa kuminsá ku preparashonnan for di awor i tuma kontakto ku un di e konseheronan di konstrukshon designá pa orientashon i guia den e proseso.

Advertisement