Siudadano Suzy Thode resientemente a kompartî su preokupashon riba dos asuntu ku ta afektá komunidat di Boneiru direktamente: subida resien di tarifa di koriente i e falta di presensia di lidernan polítiko lokal na un di e fechanan históriko di sumo importansia pa nos isla.

Dia 30 di yüni ultimo, Thode a dirigí un karta ofisial di opheshon na Konseho Insular, Kolegio Ehekutivo i Water- en Energiebedrijf Bonaire (WEB). Den e karta aki, el a ekspresá su desakuerdo apsoluto ku e oumento di tarifanan di koriente, kual el a deskribí komo "inaseptabel i no-profeshonal".

Thode a argumentá su posishon a base di e rapòrt di Nationale Ombudsman, kual ta duna prueba konkreto ku tin un nivel haltu di pobresa na Boneiru i ku por lo ménos 40% di e poblashon ta biba den skarsedat. Segun Thode, e realidat sosial ekonómiko aki ta hasi kualke medidia di subida di kosto di bida totalmente inaseptabel pa e siudadano komun.

Banda di e tema ekonómiko, Thode a trese tambe dilanti un preokupashon serio tokante evento resien di konmemorashon di abolisashon di sklabitut na Boneiru. El a lamentá profundamente ku tabatin apénas dos lider polítiko lokal presente na e akto importante aki, miéntras ku e restu di Konseho Insular tabata na Kòrsou.

Thode a kuestioná esaki komo un falta di rèspèt pa baluartenan i historia di Boneiru. El a hasi un yamada pa gobernantenan kuminsá duna ehèmpel dor di balorá i mustra rèspèt pa e pueblo i kultura ku nan ta representá, promé ku tur kos.

Advertisement