Tourism Corporation Bonaire (TCB) i Fundashon Formashon Pa Mañan (FORMA) a dal un paso importante pa sektor turístiko dor di firma un akuerdo di koperashon (MOU). E meta prinsipal ta pa fortifiká kapasitashon di guianan turístiko, garantisando un servisio di kalidat i outéntiko pa nos bishitantenan.

E akuerdo a keda firmá pa señora Soraida T. Mensche-Statius (direktor di FORMA) i señora Elesiër Angel (direktor di TCB). Ku e firma akí, TCB ta rekonosé ofisialmente e kurso “Bonaire in Depth and Guiding Skills”, ku FORMA a bini ta ofresé kaba pa vários aña.

Un punto fundamental di e kapasitashon akí ta material outéntiko desaroyá pa señora Sue Felix. Su trabou ta forma e base di konosementu ku e guianan ta haña tokante historia, kultura i naturalesa di Boneiru. Danki na e base akí, partisipantenan ta siña kon pa duna rekorido na un manera responsabel i profundo.

Segun direktor di TCB, Elesiër Angel, e papel di un 'tour guide' ta sumamente importante pa eksperensia di un turista. Tour guidenan ta karga nos historianan i nos konekshon ku naturalesa. Pa medio di e kolaborashon akí, TCB i FORMA ta invertí den hendenan ku ta representá nos isla ku konosementu i outentisidat.

Segun TCB, pa medio di e kolaborashon aki  ta duna balor na e sertifikashon di FORMA i ta sòru pa mas guia bon prepará pa duna informashon korekto i signifikativo ku sa kon pa kuida i splika nos herensia úniko. Ku e tipo di lasonan aki Boneiru ta sigui posishoná su mes komo un destinashon ku no solamente ta bende solo i laman, si no tambe un historia riku i un servisio profeshonal.

Advertisement