TCB ta fortifiká su presensia na merkado kanades ku mishon na Toronto

Lokal

TCB ta fortifiká su presensia na merkado kanades ku mishon na Toronto

Pa AC 18 Aug, 2026 5 Min Lesa 5 Bishitante

Tourism Corporation Bonaire (TCB), huntu ku Sorobon Luxury Beach Resort, a realisá un mishon di benta na Toronto entre 11 i 14 di ougùstùs 2026. E mishon a tuma lugá den preparashon pa regreso di buelonan direkto di WestJet entre Toronto i Boneiru pa e temporada di wenter 2026-2027. E mishon tabata enfoká riba promoshon di Boneiru na merkado kanades, fortifikashon di kontaktonan ku profeshonalnan di industria di biahe i stimulashon di reservashonnan pa e temporada binidero.

Canada ta forma parti di e sinku merkadonan mas importante pa turismo di estadia na Boneiru. Segun sifranan presentá pa TCB, e kantidat di bishitante for di Canada a subi di 3.437 na 2023 pa 5.248 na 2025, un kresementu di aproksimadamente 53%. Den e promé seis lunanan di 2026, Canada tabata e di kuater merkado mas grandi, ku 3.541 bishitante di estadia.

Direktor di TCB, Elesiër Angel, a indiká ku e kresementu di merkado kanades ta mustra importansia di presensia riba merkado i konektividat aéreo. Segun Elesiër, e enfoke ta inkluí tantu e temporada di wenter 2026-2027 komo e desaroyo di demanda pa término mas largu.

Durante e bishita, e delegashon a atendé Canadian Meetings and Events Expo (CMEE) i a sostené reunionnan ku representantenan di WestJet i Sunwing. Durante e reunionnan, e partidonan a evaluá e ruta Toronto-Boneiru i diskutí posibel kampañanan di merkadeo pa e periodo binidero.

TCB tambe a organisá aktividatnan pa profeshonalnan di biahe, komo meta duna mas informashon tokante Boneiru i posibilidatnan turístiko di e isla. Un di e aktividatnan tabata un sena ku presentashon i demonstrashon di live cooking, prepará bou di guia di shèfkòk boneriano Giovannie Veld.

Mas di 25 konsehero di biahe i representante di agensianan di biahe a partisipá na e evento, mientras ku un grupo adishonal di 20 profeshonal di biahe a asistí na un presentashon durante lùnch.

E dos aktividatnan a sera ku un loteria, ku premionan ku tabata inkluí un buelo ida i buelta entre Toronto i Boneiru, kortesia di WestJet; un estadia di shete anochi pa dos persona na Sorobon Bay Hotel, inkluyendo desayuno; i un estadia di kuater anochi pa dos persona na Delfins Beach Resort.

TCB a indiká ku e mishon ta forma parti di su esfuersonan pa mantené i desaroyá e merkado kanades i pa sostené konektividat direkto entre Toronto i Boneiru.