Djaluna 10 di ougùstùs 2026, un temblor di magnitut 7,4 a sakudí oeste di Colombia. E temblor a sosodé 7:34 di mainta ora lokal, ku episentro serka San José del Palmar, den departamento Chocó. E moveshon a keda sinti na diferente parti di Colombia i a kousa daño konsiderabel den e region.

Relashoná ku e temblor resientemente na Colombia, Zorg en Jeugd Caribisch Nederland (ZJCN) ta mantené kontakto ku partnernan den e region i ta sigui monitoreá e situashon.

ZJCN a informa ku 40 pashènt i kompañante ku ta atualmente na Colombia ta bou di su atenshon. Segun e organisashon, a logra tuma kontakto ku tur e personanan akí i por konfirma ku nan ta seif.

Pashèntnan i kompañantenan ku mester di sosten por tuma kontakto ku nan casemanager. Afó di orario di ofisina, ZJCN ta disponibel via su number di pikèt, tantu pa yamada komo via WhatsApp.

Boneiru ta ekspresá solidaridat ku Colombia

Gezaghèber John Soliano, na nòmber di Entidat Públiko Boneiru, a ekspresá su solidaridat ku pueblo di Colombia i ku komunidat colombiano na Boneiru.

“Mi ke ekspresá mi solidaridat na pueblo di Colombia i henter komunidat colombiano na Boneiru. Mi ta deseá kada persona afektá di un manera òf otro hopi forsa den e tempu difísil akí. Boneiru ta ku boso,” Soliano a deklará.

Asistensia pa residente di Boneiru

Residente di Boneiru ku atualmente ta na Colombia i ku mester di asistensia por tuma kontakto ku representashonnan di Reino di Hulanda den e país.

E Embahada Hulandes na Bogotá ta situá na Carrera 13 No. 93-40, Piso 5, Bogotá.  Na Cali, por tuma kontakto ku e Consul Honorario di Reino di Hulanda.

Pa preguntanan urgente, Ministerio di Asuntunan Eksterior di Reino di Hulanda ta disponibel 24/7 na +31 247 247 247.

Entidat Públiko Boneiru i ZJCN ta sigui monitoreá e situashon i ta mantené kontakto ku partnernan relevante den e region.

Advertisement