Thammy Albertsz nombrá komo Komandante General nobo di Kuerpo di Bombero Hulanda Karibense

Orden Públiko i Seguridat

Thammy Albertsz nombrá komo Komandante General nobo di Kuerpo di Bombero Hulanda Karibense

Pa AC 21 Aug, 2026 5 Min Lesa 51 Bishitante

Kuerpo di Bombero Hulanda Karibense (BKCN) tin un lider nobo. Thammy Albertsz a ser nombrá ofisialmente komo Komandante General nobo di e kuerpo, asumiendo responsabilidat prinsipal pa duna siguridat, liderasgo i mehorashon kontinuo di servisio di bombero den region Karibe Hulandes.

Durante un entrevista, Albertsz a repasá su trayektoria i su vishon pa futuro rekordando ku e la kumisa labora na Kuerpo di Bombero na aña 2018 i for di aña 2022 te ku 2026 e tabata komandante di post lokal.

For di 16 di yüli último, su nombramentu a drenta na vigor ofisial, maske ya e tabata ehekutando e tareanan aki pa algun luna kaba. Albertsz ta sigui Thijs Verheul, kende a desempeñá e funshon di Komandante General durante último sinku aña.

E Komandante General nobo ta enfatisá importansia di union entre e tres islanan (Bonaire, Sint Eustatius i Saba) pa fortalesé e organisashon. E la indika ku e kuerpo ta un famia ku ta parti kobertura i servisio riba e tres islanan: Bonaire, Sint Eustatius i Saba i lo enfoká awor mas ku e ponensia 'Samen sterk, samen veilig, samen verbonden', huntu mas fuerte, huntu mas sigur, huntu mas konektá pa huntu krese i bira un kuerpo mas uní i mas fuerte pa duna un nivel di siguridat altísimo na nos komunidat.

Na final Albertsz a manda un mensahe di motivashon na e hubentut ku ta deseá di drenta den servisio òf tin kualke otro meta profeshonal indikando ku kaba skol, haña bo diploma mester ta na promé lugá. Esaki ta sumamente importante. Pone un meta bo dilanti, i traha paso pa paso i invertí konsientemente den bo mes pa yega na bo metanan. Pa esnan ku ke drenta kuerpo di bombero, kaba bo skol i bin ku un bon aktitut, pasobra esei ta habri porta pa drenta serka nos.