Den un ambiente di gratitut i rèspèt, tres habitante di Boneiru a keda honrá e aña aki ku un kondekorashon Real. Durante e tradishonal ‘Yobida di sinta’ (Lintjesregen), Gezaghebber John Soliano a entregá e insignianan na e damanan ku pa añanan largu a dediká nan tempu i esfuerso na bienestar di nos komunidat, sin buska interes propio.

E kondekorashonnan aki ta representá un muestra di apresio di parti di e monarka Hulandes pa personanan ku a duna un aporte eksepshonal den áreanan manera kultura, bario, naturalesa i sosten sosial.

E honoradonan di e aña aki ta tres dama ku pa nan dedikashon inkansabel na Boneiru a keda rekonosé:

• Maria Clarenda Clarinda: Nombrá komo Kabayero (Ridder) den Órden di Oranje-Nassau.
• Suzette Maria Bergland-Balentin: Nombrá komo Kabayero (Ridder) den Órden di Oranje-Nassau.
• Alyatte Aquilina Quirindoongo-Geertruida: Nombrá komo Miembro den Órden di Oranje-Nassau.

Durante su diskurso, Gezaghebber John Soliano a enfatisá ku e selebrashon aki no ta trata di status ni puesto, sino di algu hopi mas profundo ku ta e amor pa bo próhimo.

Na Final gezaghebber a suprayá ku den un mundu kaminda hopi biaha individualismo ta manda, e tres personanan aki ta un ehèmpel bibu di kon importante ta pa tene otro na bista i traha huntu pa fortifiká nos sosiedat.

E trabou di e damanan aki a laga un marka profundo den bida di hopi habitante. Nan kompromiso no solamente ta yuda na konstrukshon di un Boneiru mas fuerte, sino ku e ta sirbi tambe komo un fuente di inspirashon pa e generashonnan nobo pa nan tambe aportá na bienestar di nan komunidat.

Advertisement