Polis a detené tres persona den mardugá di djaweps 2 di yüli despues di un persekushon ku a kuminsá na sitio di stashoná outo di un supermerkado na Kaya Industria. Durante e akshon, a konfiská un arma, un vehíkulo i diferente otro artíkulo, inkluyendo supstansianan nárkotiko.

Segun polis, un patruya a mira un vehíkulo sospechoso stashoná na e sitio i a opta pa hasi un kòntròl. Na momentu ku e patruya a yega mas serka, e shofùr a start e outo i a kore bai. A pesar ku polis a duna diferente señal pa para, e shofùr a neglishá e òrdu i a sigui su kaminda ku mas velosidat.

Despues di un persekushon den diferente kaya, polis a logra blòkia e vehíkulo bèk na Kaya Industria. E shofùr a keda detené pa no obedesé òrdu di polis. Durante e kòntròl, polis a haña un tas ku un arma den dje, despues di kua a detené tambe otro dos okupantenan pa presunta violashon di Lei di Arma di Kandela BES.

E sospechosonan ta un hòmber di 26 aña ku inisial J.G.S., un hòmber di 37 aña ku inisial B.E.E. i un muhé di 26 aña ku inisial J.A.H.

Polis a konfiská e vehíkulo i diferente otro artíkulo ku a topa den dje. Ademas, investigashon a mustra ku e shofùr tabata manehando bou di influensia di alkohòl, un echo ku lo wordu inkluí den su prosès-verbal.

Despues di investigashon forénsiko di KPCN, a resultá ku e arma topá tabata un arma di airu. E investigashon den e kaso ta sigui.

Advertisement