Presidente di Merka, Donald Trump, a publiká un imagen kontroversial riba su ret sosial Truth Social. Den e publikashon, Trump ta mustra mapa di Venezuela tapá ku e bandera merikano i ku e teksto "51st State". E imagen aki a keda kompartí tambe pa e kuenta ofisial di Kas Blanku riba e plataform X, loke a generá rechaso inmediato den e region.

E publikashon aki ta bini presis un dia despues ku Trump mes a deklará na e kadena Fox News ku e ta konsiderando "seriamente" pa hasi Venezuela e di 51 estado di Merka. Segun Trump, e motibu ta e reservanan enorme di petroli di e pais, kwa ta balorá na 40 bion dòler, i pasobra segun e, e pueblo venezolano "ta stim’é".

E tenshon aki ta tuma lugá algun luna despues di e Intervenshon merikano na Venezuela, un operashon militar kaminda forsa spesial di Merka a arestá e mandatario Nicolás Maduro.

Rechaso total di Venezuela i Colombia

Presidente interino di Venezuela, Delcy Rodríguez, a duna un deklarashon fuerte pa nenga i kondená e idea aki. Rodríguez a enfatisá ku Venezuela "hamas" a konsiderá un union asina ku Merka i ku e pais lo defendé su soberania komo un nashon independiente i no komo un kolonia.

Presidente di Colombia, Gustavo Petro, tambe a kritiká Trump severamente via su retnan sosial. Petro a afirmá ku e idea di Trump ta "kompletamente kontrali na e pensamentu di Simón Bolívar" i ku e ta un falki kontra derecho di e pueblo venezolano pa disidí riba nan propio futuro.

No ta e promé biaha ku Trump ta hasi e tipo di proposishonnan aki. Den pasado el a yega di hasi e tipo di komentario probokativo similar tokante aneksá Kanadá òf kumpra Groenlandia.

Advertisement