Frakshon di Union Patriotiko Boneiriano (UPB) a reakshoná riba karta ku Gezaghèber John Soliano a manda na Konseho Insular tokante e situashon polítiko i kontinuidat di gobernashon na Boneiru. Den un karta fecha 11 di ougùstùs, UPB a indiká ku nan ta kompartí preokupashon tokante trankilidat i stabilidat atministrativo, pero nan no ta di akuerdo ku e impreshon, ku e krísis aktual a surgi a konsekuensia di desishon di UPB pa retirá su konfiansa di kolaborashon ku MPB.

Segun UPB, e krísis di gobernashon a kuminsá kaba na 26 di yüli 2025, ora dos diputado a renunsiá nan funshon sin duna splika­shon i bandoná Kolegio Ehekutivo. Segun e frakshon, durante un periodo Boneiru a keda sin un Kolegio Ehekutivo kompleto, situashon ku a kreá hopi inseguridat atministrativo. UPB a agregá ku, aun despues di nombramentu di dos diputado nobo, e problema no a keda resolvé. Nan ta bisa ku e situashon a eskalá mas ainda na yanüari di e aña akí, ora ku un miembro di Partido Demokrat a deklará su mes independiente den Konseho Insular.

UPB ta enfatisá ku Boneiru ainda ta den e konsekuensianan di e krísis ku a kuminsá na 2025, i no den un krísis nobo kousá pa e desishon resiente di nan partido. E partido tambe a bisa ku ta “doloroso” pa mira ku hustamente UPB, ku segun nan ta e úniko partido ku desde e elekshonnan di mart 2023 a mantené su frakshon kompleto di tres miembro sin kambio, pero awor ta ser relashoná ku un krísis ku nan ta konsiderá ku no a ser kousá pa nan.

Tokante e menshon di posibel interferensia polítiko den e aparato, UPB a indiká ku nan no ta rekonosé nan mes den e deskripshon akí. Segun e frakshon, kontrolá ehekushon di gobièrnu i buska solushonnan polítiko ta parti normal di trabou di representantenan skohé pa pueblo. UPB a deklará ku nan ta respetá e ròl di gezaghèber komo wardadó di bon gobernashon i integridat, pero na mes momentu nan ta spera ku e espasio polítiko di Konseho Insular tambe lo ser respetá. Segun e frakshon, formashon di mayoria òf minoria polítiko, manera tambe posibel kolaborashon entre partidonan, ta responsabilidat di Konseho Insular i su frakshonnan.

Apesar di e diferensianan aktual, UPB a afirmá ku nan ta keda dispuesto pa diálogo konstruktivo i pragmátiko tokante futuro atministrativo di Boneiru, semper ku interes di pueblo ta keda na promé lugá.

E karta ta firmá pa lider di frakshon Benito Dirksz i a ser manda tambe na miembronan di Konseho Insular.

Advertisement