Unión Sindikal Boneriano (USIBO) a konmemorá su dies aña di eksistensia, 5 di yüni 2026, durante un evento kaminda lidernan sindikal, representante di gobièrnu, empresarionan i Diálogo Sentral a reuní pa reflehá riba trayekto i logronan di e organisashon for di 2012 te ku awe.

E selebrashon a keda karakterisá pa un ambiente positivo i un fuerte sentido di rekonesementu pa kontribushon di USIBO den fortalesimentu di relashonnan laboral na Boneiru. Durante e evento, varios oradó a ekspresá nan apresio pa e ròl ku e union a hunga na mesa di diálogo entre trahadónan, gobièrnu i sektor privá.

Entre e oradónan tabata e promé presidente di USIBO, Chaly Anthony, e aktual vise-presidente Angelo Vrolijk, i diputado di finansas i ekonomia Jennifer Mohamed-Joenoes, ku a representá tambe asuntunan sosial i di labor. Tambe a partisipá presidente di Kámara di Komersio, representante di negoshi, i gezaghèber di Boneiru, John Soliano.

Durante e programa, moderadó Jefferson Rosaria, akompaña ku un presentashon visual di Nòchi Willem, a destaká historia di USIBO for di 2012 pa 2026, inkluyendo kontribushon di diferente presidensia i desaroyo di e union den komunidat Boneriano.

Representantenan di sektor privá i Diálogo Sentral a resaltá evolushon di relashon entre sindikatonan i empresanan. Segun nan, den último añanan a opservá un kresementu signifikante den konfiansa mutuo i kolaborashon struktural, loke a kontribuí na mas stabilidat sosial-ekonómiko.

Representante di Diálogo Sentral a señalá ku kresementu di USIBO,  pa mas ku 25 empresa afiliá awe ta un prueba di e trabou kontinuo i impakto di e organisashon.

Representantenan di gobièrnu tambe a usa e okashon pa rekonosé ròl di USIBO den desaroyo sosial di Boneiru. A indiká ku e union a logra transformá su posishon den komunidat for di konfrontashon pa diálogo konstruktivo, transformando den un partner importante den proseso di toma di desishon.

Durante e evento, a presentá un mensahe di union i invitashon pa sigui fortalesé sektor sindikal na Boneiru. A enfatisá ku, apesar di diferensianan, un meta komun mester prevalesé: desaroyo sostenibel i hustisia sosial pa tur trahadó i su famia.

E promé presidente di USIBO, Chaly Anthony, a rekonosé e trayekto di e union i a hasi un yamada riba renovashon di kompromiso entre tur organisashon sindikal riba Boneiru pa traha mas serka di otro den futuro.

E evento a sera ku un mensahe fuerte di solidaridat: “E mas fuerte ta yuda e mas débil,” ku tabata resoná komo un yamada pa unioni kolaborashon pa sigui konstruí un Boneiru mas fuerte pa futuro.

Advertisement