Un situashon ferfelu djárason 27 di mei anochi, a drenta un notifikashon di emergensia pa un outo ku a pegá na kandela net kantu di Stadion Antonio Trenidad den bario di Rincon. E kandela ku a kousa basta huma i preokupashon, a duna outoridatnan motibu pa para e partido di futbòl ku tabata tumando lugá e momento ei pa asina garantisá siguridat general.

Alrededor di 9:55 or di anochi, na momento ku tabata hungando un partido di futbòl entre e ekiponan di Atlétiko Flamingo i ATC, ‘meldkamer’ sentral a haña notifikashon ku na Kaya Bototé, net na altura di e stadion, un vehíkulo ta na kandela. E situashon tabata peligroso, mirando ku tabatin un risiko ku e vlamnan lo por a ekspandé i pega otro outonan ku tabata stashoná serka den e mes un area.

Kuerpo di Bombero a keda dirigí mesora na e sitio di e insidente i a intervení pa dominá i paga e kandela promé ku e vlamnan por a kousa mas daño material na e vehíkulonan den serkania òf na e fasilidatnan di e stadion.

Debí na e huma i peliger inminente kantu di e tereno di wega, kuerpo tékniko i manehadónan di e partido a tuma e desishon responsabel pa para e wega mesora. E medida aki tabata nesesario pa pèrkurá pa e siguridat, trankilidat i bienestar di tur hungadónan riba vèlt, kuerpo arbitral i públiko bishitante.

Advertisement