Vèlt Elion Flores Renobá

Deporte

Vèlt Elion Flores Renobá

Pa LJ 25 Apr, 2026 5 Min Lesa 4 Bishitante

Trabounan di renovashon na Vèlt Elion Flores a keda ofisialmente finalisá despues di un luna di trabou intenso.

Direktor di INDEBON Terance de Jongh a indika ku e vèlt a haña un kara kompletamente nobo i ta kla pa risibí e komunidat di futbòl, kual awor tin un fasilidat deportivo di kalidat pa praktiká e deporte i riba un tereno renová. Un di e kambionan mas relevante ta e instalashon di yerba di ede gras, loke ta duna e vèlt un aparensia bunita i ta brinda un superfisie mas adekuá pa e futbolistanan. E proyekto aki ta representá un desaroyo signifikante pa deportistanan lokal ku tabata spera riba un mihó espasio pa entrenamentu i kompetensia.

Aunke e tereno di hunga ta kla pa uso i den un estado bon, trabounan na e kompleho deportivo lo no para aki nan. Pa garantisá ku e fasilidat ta den kondishonnan óptimal i kompleto, tin mas proyekto planiá pa e próksimo fase. Esaki lo inkluí e trabounan nesesario pa drecha e kura pa reforsá seguridat rònt di e vèlt, siguí pa instalashon di wind screens pa protehá e hungadónan i e tereno mes kontra bientu fuerte. Finalisashon di e promé fáse aki ta marka un logro importante pa futbolistanan.

Na final Terance de Jongh a klousura bisando ku e meta prinsipal ta pa e fasilidat keda komo un lugá kaminda hubentut i adultonan por topa i keda aktivo den un ambiente sano.