Very Large Crude Carrier (VLCC) ta bolbe mara na Bullenbaai despues di 10 aña

Region

Very Large Crude Carrier (VLCC) ta bolbe mara na Bullenbaai despues di 10 aña

Pa AC 07 May, 2026 5 Min Lesa 4 Bishitante

Djarason 6 di mei 2026 un Very Large Crude Carrier (VLCC) a mara na fasilidatnan di 2BAYS Curaçao na Bullenbaai pa karga kasi 2 mion barí di krudo. Ta promé biaha desde aña 2016 ku un barku di e grandura aki ta bishitá Kòrsou pa operashonnan petrolero.

E krudo ku lo wordu transportá ta aktualmente almasená den e tankinan na Bullenbaai i lo wordu hiba pa merkadonan internashonal. Segun 2BAYS Curaçao i Curaçao Refinery Utilities (CRU), e karga ta konsistí prinsipalmente di krudo ku a yega Kòrsou durante e promé lunanan di 2026.

Un VLCC ta un barku petrolero ku por tin un largura entre 300 i 350 meter i un hanchura entre 50 i 65 meter. E fasilidatnan di Bullenbaai ta konsiderá apto pa akomodá barkunan di e tipo aki danki na e profundidad natural di e bahia.

Pa prepará pa e yegada di e barku, CRU, huntu ku diferente kontratistanan lokal, a hasi trabounan di mantenshon na e infrastruktura operashonal. Empleadonan tambe a sigui entrenamentu i refreskamentu di proseduranan relashoná ku maneho di barkunan grandi. Ademas, a koordiná ku KTK pa garantisá disponibilidad di loods durante e proseso di entrada i salida di e barku.

Segun e kompanianan envolví, ta spera ku e proseso di transferensia di krudo lo tuma varios dia E evento ta marka e regreso di operashonnan ku VLCC na Kòrsou despues di un periodo di dies aña.