Konsumidónan na Boneiru por spar te ku $705,17 pa luna si nan kompará preisnan i hasi nan kompra di manera strategiko na diferente supermerkado. Esaki ta sali for di e último informe di Fundashon Tienda pa Konsumido Boneriano (FTPKB) tokante preisnan di produkto básiko durante luna di yüni 2026.

Segun e organisashon, e diferensia promedio entre produktonan mas barata i esnan mas karu den e lista básiko di kompra a yega 43,2% den luna di yüni. E sifra ta mustra ku tin diferensia konsiderabel entre preisnan na diferente supermerkado na Boneiru

Den e ranking di supermerkadonan ku ta ofresé mas produkto na preis mas abou, Warehouse ta okupá promé lugá. Konsumidónan por spar te ku $82,65 dor di kumpra 22 di e produkto nan mas barata na e tienda aki, spesialmente fruta, berdura i artíkulonan pa beibi.

Caribe Nobo ta sigui na di dos lugá. Segun FTPKB, e supermerkado ta ofresé 27 produkto ku preisnan mas kompetitivo, permitiendo konsumidónan spar te ku $79,55. Entre e produkto nan ta fruta, berdura, hariña i diferente produkto di grano.

Na terser lugá ta LiangXiang, kaminda konsumidónan por spar te ku $70,08 riba 17 produkto, prinsipalmente artíkulonan pa baby, fruta i berdura.

FTPKB ta señalá ku Warehouse, Caribe Nobo i LiangXiang huntu ta representá 33% di e montante total ku por spar riba e lista básiko di kompra.

E organisashon ta rekomendá konsumidónan pa kompará preisnan promé ku hasi kompra i, kaminda ta práktiko, kombiná bishitanan na diferente supermerkado pa probechá di e mihó preisnan disponibel. Tambe ta konsehá pa pone atenshon spesial riba produktonan kaminda e diferensia di preis ta mas grandi.

“Bo forsa di kompra ta den bo mes eskoho,” FTPKB a deklará, enfatisando ku konsientisashon di preis por resultá den spaarmentunan signifikativo pa famianan na Boneiru.

Advertisement