Water en Energiebedrijf Bonaire (WEB) a dirigí su mes na komunidat pa duna trankilidat i detaye adishonal tokante kambionan resien den formato di su faktura nobo. Ku e meta pa duna e mihó servisio posibel, e kompania ta enfatisá ku e kambio akí ta pa garantisá un proseso di komunikashon i kobransa transparente, fásil i komprendibel pa tur usuario na Boneiru.

Despues di e introdukshon di e formato nobo, WEB a risibí bastante yamada di klientenan ku tabatin pregunta, spesialmente tokante e montante total riba nan faktura. CEO di WEB, Raymond Silberie, a sigurá ku e kompania ta tuma tur e pregunta i sugerensianan akí ku hopi seriedat. Pa resolvé e inkietutnan mesora, e ekipo di WEB ta analisando e tres preguntanan mas frekuente ku nan a risibí. E informashon akí lo sirbi pa sigui ahustá i modernisá e faktura, garantisando ku e ta keda amigabel pa tur persona den komunidat.

Pa trankilisá e klientenan i evitá kualke tipo di konfushon, Sra. Aima Romeo-Cecilia, Manager di Servisio na Kliente, a brinda un aklarashon detayá di e struktura nobo. El a splika ku e faktura awor ta dividí klara mente den dos parti prinsipal:

• E montante aktual: E kargo pa e konsumo di e luna en kuestion (blou riba e potrèt abou). 
• Saldonan anterior vensí: E montantenan pendiente di lunanan anterior (kòrá riba e potrèt abou).

  

E separashon visual akí ta yuda usuario pa komprondé eksaktamente kiko e ta pagando, risibiendo un bista mas strukturá di su kuenta i uso di lunanan anterior. Ounke e diseño a kambia pa hasi e uso di koriente i awa mas visibel i fásil pa komprondé, e faktura lo sigui keda emití mensualmente ku e mes un informashon esensial di semper. Banda di e mehorashon visual riba papel, Sr. Silberie a duna di konosé ku WEB a introdusí servisionan digital nobo. E kompania ta stimulá tur e kliente pa hasi e transishon pa e faktura digital, lo kual no solamente ta fasilitá trámitenan mas rápido i efisiente, pero tambe ta kontribuí na un maneho mas sostenibel.

Advertisement