Ku un rekorido den bùs pa diferente bario di Boneiru, Kuido i Hubentut Hulanda Karibense (ZJCN) a duna start ofisial na e luna di kuido di kriansa 2026. E kampaña di e aña aki ta karga e tema “Un kurason kaluroso, un hogar seif” i ta pone enfoke riba konsientisashon i e buskeda pa famianan di kriansa nobo.

Durante e aktividat di apertura, un tim di profeshonal di kuido di kriansa a bai den kombersashon ku habitantenan tokante e importansia di un ambiente seif i stabil pa muchanan ku no por keda temporalmente na kas. E tim a repartí foyetonan informativo i a duna splikashon tokante kiko kuido di kriansa ta enserá i kon hende por kontribuí.

Segun ZJCN, e nesesidat pa mayornan di kriansa ku por brinda apoyo na muchanan ku un ‘background’ kompleho ta grandi. Pa e muchanan aki, un hogar kaluroso i seif por hasi un diferensia importante den nan desaroyo.

Durante e rekorido tambe a bishitá diferente organisashon i partnernan di kolaborashon, inkluyendo Akseso, EOZ, Mental Health Caribbean (MHC) i Voogdijraad. Nan a risibí un muestra simbóliko di apresio komo parti di e luna di kuido di kriansa.

E organisashon ta indiká ku e aña aki a skohe konsientemente pa pone mas enfoke riba e komunidat. “Kuido di kriansa ta un responsabilidat di nos tur,” segun ZJCN. “Dor di buska kontakto direktamente ku habitantenan, nos kier hasi e tema mas aksesibel i motivá mas hende pa konsiderá bira mayor di kriansa.”

Advertisement