E delantero i máksimo goliadó históriko di selekshon Di Hulanda, Memphis Depay, ta enfrentando un kareda kontra oloshi pa e por yega Kopa Mundial 2026 despues ku el a sufri un rekaida nobo durante su proseso di reabilitashon na Brazil.

Depay tabata for di tereno di wega kaba for di fin di mart pa motibu di un leshon na su bèl di pia drechi ariba (thigh muscle injury). Miéntras e tabata traha duru pa su rekuperashon pa asina por regresá kancha bèk, e hungadó a kuminsá sinti dolo fuerte na su pia robes. E leshon nobo aki a lanta preokupashon grandi tantu serka su klup Corinthians komo den e kuerpo tékniko di Hulanda.

Pa e motibu aki, e klup brasilero a disidí di no riska nada i a lag’é afó pa e biahe pa Uruguay kaminda Corinthians tin ku enfrentá Peñarol den Copa Libertadores. Su partisipashon den e próksimo partidonan di liga tambe ta na duda.

E notisia aki ta un sla duru pa e tékniko hulandes Ronald Koeman. E entrenadó ta spera di partisipá su lista final pa Mundial 2026 promé ku 1 di yüni 2026. E notisia di ùltimo ora aki di Memphis ta hasi e eskoho hopi kompleho ounke Koeman ta mustra optimista riba e situashon.

Depay mes, ku tin 55 gol anotá pa "Oranje", ta masha rabiá i frustrá ku e situashon aktual. E sa ku kada partidó ku e pèrdè ta mengua su chènsnan pa yega den un bon kondishon físiko i ku ritmo na e torneo di mas grandi na mundu. E próksimo dianan lo ta krusial pa determiná si e delantero ta rekuperá pa por duna su pais un man den Kopa Mundial òf si e mester keda kas wak e weganan na televishon.

Advertisement