Museo di Hall of Fame di Beisbòl a habri un eksibishon spesial pa selebrá tres nòmbernan nobo ku lo drenta den historia e aña aki: Carlos Beltrán, Andruw Jones i Jeff Kent.

E eksibishon, situá na di dos piso di e museo na Cooperstown, ta duna fanátikonan un oportunidat úniko pa mira artíkulonan históriko ku nunka promé tabata den bista di públiko. Entre e piesa nan di mas remarkabel, por haña bala di e di dos home run ku e Yu di Kòsou Andruw Jones a dal den Game 1 di World Series 1996, komo tambe e bate ku el a usa na 2005 pa konektá su di 50 home run di e temporada ei.

Pa loke ta e otro estrenantenan:

· Carlos Beltrán: Ta eksibí su premio di Rookie of the Year (1999) i e uniform di Astros ku el a bisti durante su pashon inkreibel den e play-offs di 2004.

· Jeff Kent: Bo por mira su premio di MVP di aña 2000 i e road jersey ku el a bisti ku San Francisco Giants den World Series di 2002.

Fecha nan importante
E selebrashon grandi, kaminda lo duna e plakanan ofisial, lo tuma lugá djadumingu 26 di yüli pa 1:30 p.m. riba tereno di Clark Sports Center. Mas ku 40 miembro aktual di Hall of Fame lo t’ei presente pa duna e hòmbernan aki bon bini na e klup mas eksklusivo di beisbòl.

Fanátikonan ku ta planiá pa biaha pa Cooperstown por partisipá tambe den e evento "Turn Two" ku Ozzie Smith riba djabièrnè 24 di yüli, òf presensiá e grabashon di podcast "The Road to Cooperstown" djaluna 27 di yüli na Doubleday Field.

Advertisement