Koredó Ethuriel Nicolaas a biaha pa e Kòrsou pa partisipá den "Kareda #1", e evento di apertura ofisial di e temporada di ‘touring cars’ eléktriko di eskala 1/10 pa kore riba kaya.

E kompetensia, ku ta keda organisá pa Curaçao Radio Control Cars Drivers Association (CRCCDA), ta tuma lugá na CAS Grandi Raceway i ta primintí di ta unu bon bishitá, yen di adrenalina pa tur amante di e deporte akí.

Nicolaas ta representá Boneiru den e kategoria mas kompetitivo ku ta '21.5T Stock Class'. Den e divishon akí, e abilidat personal tras di e stür i e asina yamá setup tékniko di e outo ta hunga un papel krusial pa por hasi e diferensia riba pista.

Pa e reto akí, e koredó Boneriano lo hasi uso di e outo Xray X4, kual ta keda konsiderá aktualmente un di e modèlnan mas avansá i modèrno na mundu pa e kategoria akí.

Su tim a duna di konosé ku nan ta biahando ku tur konfiansa i preparashon sabiendo ku semper e kompetensia na Kòrsou ta fuerte, pero ku e Xray X4 nan tin un base sólido. Nan enfoke prinsipal durante training ta pa haña e balansa i grip perfekto riba e asfalt di CAS Grandi pa por lucha pa un lugá i hasi Boneiru orguyoso.

E skema di e kareda lo ta for di mainta, inisiando 10:30 a.m. ku e kualifikashonnan ofisial. Den atardi e emoshon lo subi di nivel ku e karedanan final.

E temporada akí tin debut di un kategoria nobo ku ta 17.5T FWD Stock Class, un outo ku tin trakshon dilanti (Front-Wheel Drive), kual outomátikamente ta garantisá un variedat mas amplio di espektákulo pa e públiko ku lo bishitá Sport Complex CAS Grandi.

Advertisement