Desishon di Kolegio Ehekutivo pa organisá Festival Regatta 2026 den Centrumgebied ta kousa hopi reakshon den komunidat i tambe serka organisadónan di e evento.

E desishon a keda tuma dia 26 di ougùstùs, basá riba un konseho prepará pa Gezaghèber i tim di APK, ku ta konsistí di representantenan di entre otro JAZ, R&O, Toezicht & Handhaving, KPCN i BKCN. Den e konseho, a señalá varios reto relashoná ku seguridat ku a keda identifiká durante último añanan na evento grandi organisá riba Wilhelminaplein, sitio di parker banda di e anterior bestuurskantoor i parti di Kaya C.E.B. Hellmund.

Advertisement

Segun e konseho, eventonan den sentro di siudat a krese konsiderablemente ku e tempu. Esaki ta krea preokupashon tokante kòntròl di multitut grandi, aksesibilidat pa servisio di emergensia, maneho di tráfiko i seguridat públiko en general. E tim di APK a konkluí ku pa garantisá ku evento grandi por sigui tuma lugá den sentro di siudat den futuro, tabatin mester di hasi eskoho kla tokante lokalidatnan apropiá i stipulá kondishonnan adishonal di seguridat.

Durante un reunion di Konseho Insular posteriormente, a keda konfirmá ku Tourism Corporation Bonaire (TCB) lo ta e organisashon responsabel pa organisá Festival Regatta 2026.

Organisadónan di e festival, Tourism Corporation Bonaire (TCB), SKAL i Massive Productions Bonaire a presentá un dokumento adishonal ku ta kontra-argumentá e eskoho pa e área di centrumgebied. Den nan informe nan ta indiká ku e lokalidat proponé por krea varios reto operashonal i di seguridat.

Segun e organisadónan, e lokalidat aktual ta disponé di aproksimadamente 9.432 metro kuadrá repartí riba diferente zona, mientras ku e área di sentro ku a keda proponé ta alrededor di 4.500 metro kuadrá. Nan ta argumentá ku esaki ta representá un redukshon di mas ku 50% den espasio disponibel, loke por tin konsekuensia pa fluho di bishitante, instalashon di fasilidatnan i maneho general di seguridat.

Nan ta señalá ku e lokalidat aktual tin diferente entrada i ruta di evakuashon, espasio pa food court, aktividatnan kultural, programa pa mucha i apoyo logístiko. Ademas, e lokalidat ta direktamente konektá ku e aktividatnan marítimo di Regatta, algo ku segun nan ta forma parti fundamental di e identidat di e evento. E área habrí serka di laman tambe ta ofresé mihó ventilashon natural i mas kumodidat pa bishitantenan.

Den nan dokumento, TCB, SKAL i Massive Productions ta argumentá ku e área di sentro por resultá den un konsentrashon mas haltu di hende riba un espasio mas chikí, mas desafio logístiko i mas preshon riba e infrastruktura eksistente. Pa e motibu ei, nan ta pidi na e outoridatnan pa re-evaluá e desishon tumando na kuenta seguridat di bishitante, posibilidat di evakuashon, aksesibilidat pa servisio di emergensia i relashon históriko entre Festival di Regatta i laman.

Ounke ku Kolegio Ehekutivo ya a tuma un desishon, e debate tokante lokalidat pa Festival Regatta 2026 a kontinuá. Seguridat, logístika i e karakter marítimo di e evento ta keda puntonan prinsipal den e diskushon.