Christopher Frans ta despedí komo sekretario insular di Entidat Públiko Boneiru entrante 1 di novèmber 2026. Frans, ku a okupá e funshon for di 1 di mart 2023, a disidí pa aseptá un reto nobo.

Frans a kuminsá traha na Entidat Públiko Boneiru na desèmber 2013. Durante su trayekto, el a desempeñá diferente funshon, entre otro komo konsehero di maneho senior na Direktorado di Komunidat i Kuido, konsehero atministrativo na Gabinete di Gezaghèber i sekretario insular athunto.

Advertisement

Komo sekretario insular, Frans tabata responsabel pa guia e organisashon públiko i pa duna asesoramentu i sosten na Kolegio Ehekutivo.

Den un reakshon riba su salida, Frans a indiká ku e ta wak bèk ku apresio riba e kolaborashon ku su koleganan. El a gradisí Kolegio Ehekutivo i Konseho Insular pa e konfiansa, i e organisashon públiko pa e sosten i kolaborashon durante su periodo di servisio.

“Huntu nos a komprometé nos mes pa nos organisashon i pa Boneiru. Mi ta spera ku tur hende ta sigui traha duru ku e mesun enbolbimentu, kaminda interes general di nos komunidat semper ta na promé lugá”, Frans a bisa.

Kolegio Ehekutivo a ekspresá su apresio pa e kompromiso i kontribushon di Frans na desaroyo di Entidat Públiko Boneiru, i a dese'é éksito den e siguiente etapa di su karera.

Roxanne Francees sekretario insular interino

Entrante 1 di novèmber 2026, sekretario insular suplente Roxanne Francees lo aktua komo sekretario insular interino.