Fundashon Vibra a duna un aklarashon despues ku medionan lokal i tambe Energia Tv a publiká informashon ku Fundashon Vibra ta responsabel pa organisá Karnaval di Boneiru 2027. Segun Fundashon Vibra, e informashon aki no ta korekto.

Fundashon Vibra ta splika ku e fundashon, fundá dia 9 di desèmber 2025 mediante akto notarial, ta enfoká riba empoderamentu di muhénan na Boneiru. E organisashon ta traha ku workshopnan, sírkulo di hermandat i eventonan ku ta krea espasio pa muhénan por ser nan mes, gosa i krese den un ambiente ku ta empoderá.

Advertisement

Fundashon Vibra i Vibra ta registrá na Kamara di Komersio. Segun e fundashon, nan ta e úniko entidatnan registrá ku e nòmber “Vibra” i tur dos ta fundá pa Mia Merveille-Tweed.

“Nos ta komprondé ku un malkomprendementu manera esaki por sosodé, i nos ke koregí esaki ku kalma i klaridat,” segun Merveille-Tweed, fundadó di Fundashon Vibra.

Mal komprendementu ku e nòmber Vibra

E situashon ta bira mas kompleho pasobra den otro komunikashon ta menshoná un komishon i un organisashon Vibra komo entidatnan involukrá den organisashon di Karnaval 2027. Segun informashon disponibel te ku awor, no ta kla si e komishon menshoná ta trata di un komishon stablesé pa Gobièrnu di Boneiru òf di un organisashon ku ta registrá na Kamara di Komersio.

Tambe tin un distinkshon importante ku tin ku hasi entre Fundashon Vibra, ku ta un fundashon enfoká riba empoderamentu di muhénan, i e otro organisashon menshoná relashoná ku organisamentu di Karnaval 2027.

Mas klaridat riba struktura, organisashon i responsabilidatnan relashoná ku Karnaval 2027 ta sperá durante un rueda di prensa palniá riba 23 di sèptèmber. Durante e rueda di prensa aki, mas informashon por keda revelá tokante e organisashon di Karnaval i e diferente entidat ku ta involukrá.

Fundashon Vibra ta deseá tur hende ku ta involukrá den organisashon di Karnaval di Boneiru 2027 un temporada bunita i seif. E fundashon ta pidi medionan ku a publiká e informashon anterior pa koregí e informashon tokante su involukramentu.