Hefe di Kuerpo di Kuerpo Polisial Hulanda Karibense (KPCN), Alwyn Braaf, a deklará ku violensia, menasa i intimidashon kontra agentenan polisial ta “kompletamente inaseptabel” despues di un insidente di tiroteo den kua un outo ku ta pertenesé na un agente polisial probablemente a haña bala.

Segun Braaf, KPCN ta tuma e insidente ku seriedat. El a bisa ku investigashon ta den su fase inisial i ta ehekutá esaki ku koutela i determinashon.

Advertisement

“Nos polisnan mester por hasi nan trabou di un manera sigur, sin menasa, intimidashon òf agreshon. KPCN ta para tras di su trahadónan i ta sigui komprometé su mes pa nan seguridat i protekshon,” 

"Komo hefe di kuerpo mi ke pa esaki ta bon klá: esun ku usa violensia kontra nos trahadónan, menasá nan òf purba intimidá nan, no lo deskurashá nos. Nos ta sigui hasi e trabou i lo aktua ku determinashon, denter di e límitenan di lei, kontra personanan ku pasa e límitenan aki," Braaf a deklará.

E hefe di kuerpo a agregá ku kuerpo polisial no ta tolerá intimidashon i ku lo sigui ehersé su tarea di sirbi i protehá komunidat di un manera profeshonal i den unidat. El a enfatisá tambe ku arma di kandela ilegal ta forma un menasa direkto pa siguridat públiko i ku KPCN ta sigui traha pa detektá i kita arma ilegal for di riba kaya.

E deklarashon ta sigui despus di un insidente ku a sosodé den e oranan di mardugá di djasabra 19 di sèptèmber den e área di Nikiboko. Segun informashon suministrá pa KPCN, meldkamer sentral a risibí un notifikashon tokante un tiroteo, despues di kua agentenan a bai na e sitio.

Na yegada, polis a tuma nota di loke por ta perforashonnan di bala na un outo ku ta pertenesé na un agente polisial. Te awor, KPCN no a publiká mas detayenan tokante e sirkunstansianan di e kaso ni tokante eventual sospechoso(nan).

Polis ta pidi asistensia di públiko. Personanan ku por a mira, tende òf ku tin informashon relevante tokante e insidente por yama 715-8000 òf e liña di tep anónimo 9310.

Investigashon den e kaso ta kontinuá.