Relashon entre partnernan di koalishon UPB i MPB ta sigui deteriorá. Segun deklarashonnan di UPB den un rueda di prensa yama awe, 31 di yüli, tin varios motibu ku e partido no ta mira posibilidat pa sigui traha huntu ku MPB den e forma aktual.

Un di e punto prinsipal ku UPB ta trese dilanti ta ku asuntu ku segun nan mester keda trata internamente den koalishon regularmente ta kaba den media promé ku tin deliberashon entre e partnernan. Segun UPB, esaki ta mina konfiansa mutuo i ta pone preshon riba e relashon di koalishon.

E gota ku a yena e hèmber di awa pa frakshon di UPB tabata un desishon den Kolegio Ehekutivo tokante formashon di un "Commissie Ruimtelijke en Grondzaken (CROGH)". Un komishon asesor ku lo sostené Direkshon Ruimte & Ontwikkeling (R&O) den evaluashon di petishonnan relashoná ku ordenamentu territorial, gronduitgifte, legalisashon, desaroyo di tereno i otro asunto stratégiko. E komishon lo evaluá petishonnan tokante kambio di destinashon, parsela, ekspanshon di tereno, proyektonan di desaroyo i asunto di handhaving.

Segun UPB, un proposishon ku tin tantu impakto riba maneho di tereno i desaroyo di Boneiru mester tabata trata promé den reunion di koalishon promé ku el a yega na Bestuurscollege. E partido ta mira e manera ku e tema a keda manehá komo un falta di respèt pa e partnernan di gobièrnu.

Segun UPB, e diferensianan no ta trata solamente di un komishon òf un dokumento, sino di un patron di komunikashon i gobernashon ku a bira kada biaha mas difísil pa sostené. Esaki, segun e partido, a kontribuí na e pérdida di konfiansa entre e dos partnernan di koalishon.

Frakshon di UPB lo tin un enkuentro awe atardi ku e Gezaghèber Interino. Despues di e reunion ei, e frakshon lo reuni den seno interno pa evaluá e situashon polítiko i tuma un desishon definitivo tokante su partisipashon den e koalishon aktual.

Advertisement