E mundu di futbòl hulandes ta den shòk despues di e teribel notisia ku a drenta indikando ku Xavi Simons, e medio kampista di e selekshon Hulandes, lo pèrdè Kopa Mundial 2026. E hugado di Tottenham Hotspur a sufri un leshon grave na su rudia ku ta pone un fin na su temporada i su soño mundialista.

Loke mester a bira e aña kaminda Simons lo a dal su gran salto riba e esenario mas grandi di mundu di futbol, a bira un pesadia den apénas un par di minüt durante un partido di Premier League na Inglatera.

Informashon médiko a konfirmá ku Simons a sufri un kiebro na su ligamentu krusa anterior (ACL) di su rudia drechi. Un leshon di e magnitut aki generalmente ta rekerí un operashon i un periodo di rekuperashon di por lo ménos ocho pa nuebe luna. Esaki ta nifiká ku e no solamente ta pèrdè e restu di e kampionato ku su klup, sino tambe FIFA World Cup 2026 ku ta tuma lugá den luna di yüni próksimo na Nort Amérika.

Simons mes a reakshoná via su retnan sosial ku un mensahe kòrtiku pero kargá ku emoshon bisando ku su kurason ta kibrá, pa motibu ku el a traha hopi duru pa e momentonan aki pero futbòl tin biaha tin e partinan skur tambe. Mas aleu e la indika ku e lo hasi su best pa bolbe mas fuerte.

Pa e tékniko di Hulanda, Ronald Koeman, esaki ta un pèrdida inmenso. Simons tabata e motor den e atake di e selekshon i un di e hungadónan mas den forma. Awor Koeman mester buska un plan "B" rápido pa asina purba yena e buraku grandi ku Simons ta laga atras den e skema di e selekshon.

Advertisement