Business Federation Bonaire (BFB), representá pa su presidente Paul Coolen, a manda un karta na minister di Hustisia i Seguridat di Hulanda, David van Weel, ku un yamada urgente pa reforsá temporalmente kapasidat di polis na Boneiru mientras ku ta sigui trahando riba e fortalesementu struktural di Korps Politie Caribisch Nederland (KPCN).

Den e karta, fechá 25 di yüni 2026, BFB ta indiká ku preokupashonnan tokante seguridat na Boneiru ta aumentando tantu den sektor empresarial komo den komunidat. Segun e organisashon, diferente rapòrt, dokumento gubernamental i evaluashonnan di Raad voor de Rechtshandhaving a señalá durante varios aña ku tin problema struktural den kapasidat di e kadena di mantenshon di lei na Karibe Hulandes.

Business Federation Bonaire ta referí na Kamerbrief di 22 di yüni 2026, den kua ministerio a rekonosé ku KPCN ainda ta enfrentando un falta konsiderabel di personal. Segun e informashon presentá, na final di mart 2026 tabatin un tekòrt di mas ku binti agente, obligando e organisashon pa dependé parsialmente di sosten temporal for di Politie Nationaal i Koninklijke Marechaussee.

Durante un reunion resien entre representantenan di sektor empresarial, gezaghèber di Boneiru, liderato di KPCN i representantenan di Openbaar Ministerie, a keda konfirmá ku e problema di kapasidat ta sigui di ta un desafio serio pa e organisashonnan responsabel pa mantené lei i òrdu públiko.

Segun BFB, e situashon aktual ta reflehá den oumento di preokupashon entre empresarionan i residente. E organisashon ta señalá ku e isla ta enfrentando un ola di hortamentu na negoshi i otro delitonan kontra propiedat, ku ta kousa daño finansiero, gastu adishonal pa seguridat i siguransa, i interrupshon di aktividatnan empresarial.

“Pa hopi empresario, e problema no ta solamente pérdida finansiero. E ta tokante e konfiansa pa invertí, atraé personal, risibí bishitantenan i operá un negoshi sin miedu konstante di kriminalidat,” BFB a deklará den su karta.

E organisashon ta enfatisá ku su yamada no mester keda interpretá komo kritika kontra polis, Ministerio Públiko òf e outoridatnan gubernamental. Segun nan, e profeshonalnan den e sektor ta hasi nan trabou ku dedikashon, hopi biaha bou di sirkunstansianan difísil i ku rekursonan limitá.

Business Federation Bonaire ta rekonosé ku ministerio ya a tuma medidanan pa reforsá KPCN pa medio di rekruitmentu, formashon i kooperashon den Reino Hulandes. Sin embargo, e organisashon ta argumentá ku e resultadonan di e medidanan aki lo tuma tempu promé ku nan bira visibel den práktika.

P’esei, BFB ta pidi minister Van Weel pa evaluá i, si ta nesesario, amplia temporalmente sosten operashonal for di Politie Nationaal i Koninklijke Marechaussee. Segun nan, esaki por oumentá e kapasidat di KPCN riba kòrtu plaso i yuda kombatí e aktual ola di kriminalidat mientras ku e proseso di fortalesementu struktural ta sigui.

Business Federation Bonaire a konkluí su yamada ku un petishon pa trata e situashon di seguridat riba na Boneiru ku urgensia, indikando ku seguridat ta fundeshi esensial pa bienestar sosial, kresementu ekonómiko i konfiansa den futuro.

E organisashon ta spera un reakshon di ministerio i informashon tokante posibel medidanan adishonal durante periode binidero.

Advertisement