Despues ku diferente pasahero a bira malu i a raportá algun morto, outoridatnan kompetente den salubridat ta realisando un investigashon tokante un posibel brote di infekshon di Hantavirus a bordo di un barku di ekspedishon "Hondius" den Oseano Atlántiko.

Informashon preliminar for di entidatnan di salubridat rònt mundu ta indiká ku e barku tabata den bisindario di Kabo Verde na momentu ku biaheronan a manifestá síntomanan típiko di hantavirus. E personanan aki a presentá ku kehonan di kayente di kurpa, debilidat general, i problema pa hala rosea. Aktualmente tin vários kaso bou di sospecha i outoridatnan ta pendiente pa risibí e resultadonan ofisial di laboratorio.

Informashon ta mustra ku Organisashon Mundial di Salubridat (OMS) a konfirmá dos kaso nobo di hantavirus, loke ta hasi ku total di hende afektá, lo subi pa por lo menos shete persona entre pasaheronan i tripulashon di e barku. 

• Kasonan konfirmá: 2 nobo
• Kasonan sospechoso: mas o menos 5
• Fayesé: 3 persona
• Kaso grave: por lo menos 1 pashènt ta na UCI na Johannesburg
• Estado di e barku: ta sigui dilanti di Kabo Verde sin outorisashon pa subi tera firme

Lo ke OMS ta investigá:

• Si e virus a pasa entre personanan (loke no ta komun pa hantavirus)
• Orígen di e infekshon, posiblemente durante e biahe
• Koordinashon di evakuashon médikko pa e kasonan mas grave

Organisashon Mundial di Salubridat i outoridat regional a deklará ku e riesgo pa publiko general ta abou. Operadónan di krusero a isolá pasaheronan afektá, intensifiká limpiesa, i ta koordina ku outoridat marítimo.

Un infekshon ku hantavirus por hiba na malesanan grave manera Hantavirus Pulmonary Syndrome (HPS). Esaki ta un kondishon ku ta ataká e pulmonnan i por tin konsekuensianan mortal si e pashènt no risibí atenshon médiko rápido. Maske e promé síntomanan tin biaha ta parse un simpel grip, e situashon por bira krítiko den masha poko tempu.

Ofisialnan di salubridat ta insistí ku e situashon ta riba un barku spesífiko, i no tin evidensia di riesgo general pa públiko.

Advertisement