Den diferente produkto di aros, te i yerba ku ta wòrdu bende na Albert Heijn i Jumbo, a haña restu di pestisidanan prohibí. Esaki ta sali for di un investigashon di “foodwatch”, ku a hasi tèst na desenas di produkto for di supermerkadonan na Europa. 

Segun e organisashon di konsumidó, 64 produkto a wordu investigá den kuater pais europeano. Den 49 produkto a wordu haña resto di pestisida, di kua den 45 kaso tabata trata di sustansianan ku ta prohibí den Union Europeo. Den 14 produkto, e kantidatnan hañá tabata asta mas haltu ku e límite legal. Entre e produktonan investigá tabatin aros basmati, tè bèrdè i diferente yerba manera paprika, chili i komino. Tambe produkto di marka konosí a sali positivo pa restu di pestisidanan prohibí. 

Entre e produktonan menshoná tin:

• AH Basmati Rijst
• Lassie basmati rijst
• Tilda Pure Basmati
• AH Groene Thee
• Pickwick Green Tea Ginger
• Twinings Ginger Tea
• Verstegen Paprikapoeder mild
• Euroma Paprika
• Verstegen Komijnzaad

Di akuerdo ku foodwatch, e ingrediente nan detektá ta kontené clothianidine, imidacloprid i tambe thiamethoxam. E tipo di pestisidanan aki no ta permití den Union Europeo pa motibu di e peliger ku nan por kousa na salú di ser humano i naturalesa, partikularmente pa lokual ta trata polinisashon dor di abeha i otro insekto.

Segun foodwatch, ta nesesario ku supermerkadonan ehekutá un kontrol mas severo riba tur loke ta importashon, i alabes e organisashon ta eksigí pa retirá tur produkto ku ta kontené restu di pestisida prohibí for di benta.

Tantu Albert Heijn komo Jumbo a duna di konosé ku nan ta karga gran importansia na e resultadonan presentá, i nan a enfatisá ku e artíkulonan den nan surtido mester satisfasé e reglanan estrikto di Union Europeo pa ku seguridat di kuminda.

Advertisement