Entidat Públiko Boneiru a desvelá un plachi ku nòmber ofisial Plasa Machi Mimi den sentro di Playa. Diputado Dennis Martinus a desvelá e plachi den presensia di famia di Machi Mimi i e direktor interino di Planifikashon i Desaroyo.

E plasa ta karga e nòmber di Bernabé Dominga Evertsz, konosí komo Machi Mimi. Durante hopi aña, e tabata bende piská na e sitio. Piskadónan tabata trese nan kue pa bende, mientras habitantenan tabata bishita e lugá pa kumpra piská. Ku tempu, tambe tabata bende bèrdura i fruta na e plasa. E lugá a bira un punto konosí den komunidat i a keda konektá ku diferente generashon na Boneiru.

Advertisement

Durante e desvelo, diputado Martinus a papia riba e importansia di konservá historia lokal.

“Un pueblo ku konosé su historia, sa ta di unda e ta bini. E plachi akí ta yuda nos pa keda konta e storia tras di Machi Mimi nòmber i e ta duna rekonosimentu na e hendenan ku a kontribuí na Boneiru.”

Max Erwin Juan di Grijze, ñetu di Machi Mimi, a kompartí algun rekuerdo di su wela i di su hubentut rondó di e plasa. El a relatá, entre otro, ku el a siña landa den e área tras di e plasa.

Ku desvelo di e plachi, Plasa Machi Mimi ta haña un nòmber ofisial i visibel, mientras e historia ligá na e sitio ta keda dokumentá i rekonosé.