Papiamentu
Dosié tokante e kompra proponé di e tereno Santa Clara 5-E-31 a tuma un buelta straño i sorpresivo. Ta e wèpsait di notisia Bonaire.nu e siman aki mes a reklamá pisá dikon kolegio ehekutivo no ta tuma un desishon riba rechaso di nan petishon pa por haña e dokumentonan korespondiente pa loke ta trata kompra di e tereno ku gobièrnu kier a kumpra. E komishon di konseho ku a trata e kaso for di 10 di ougùstùs a tuma un desishon i ta na gobièrnu di Boneiru awor pa disidí si nan ta sigui e konseho di e komishon si òf nò.
Bonaire News Network (BNN) / Radio Flamingo den kuadro di periodismo investigativo mesora a konsultá ku su fuentenan i nos por informá pueblo sin ningun duda ku kolegio ehekutivo dia 19 di ougùstùs na punto di agènda nr. 5, a disidí di hala atras e desishon di 5 di novèmber 2025, den kua a duna aprobashon na ehekushon di e akuerdo di kompra pa tereno di konstrukshon Santa Clara 5-E-31. Ku esaki ta lanta e pregunta atrobe kon e proseso di tuma di desishon a transkurí i kua konsiderashonnan a kondusí na e kambio di rumbo aki. Dikon kolegio ehekutivo a base di e desishon aki no a duna Bonaire.nu akseso na e dokumentashon di e proyekto aki mirando nan desishon resien i tambe ku ya a hasi tur e investigashonnan nesesario i te hasta un rapòrt a keda publiká.
E tereno industrial di mas ku tres hèktar, ku segun informashon publiká anteriormente ta pertenesé na famianan direkt di èks diputado Clark Abraham, ta den atenshon polítiko desde algun tempu pasá. E partidonan di oposishon UPB i MPB a hasi preguntanan tokante posibel konflikto di interes i e aplikashon di e obligashon pa no tuma parti den deliberashon i tuma di desishon ora tin interes personal enbolbí.
E retiro di e desishon di parti di kolegio ehekutivo ta un desaroyo importante. Sin e teksto kompleto di e desishon i su motivashon, sin embargo no por konkluí ku e kolegio a konstatá iregularidat òf ku el a desaprobá e aktuashon anterior di e gezaghèber i di èks diputado Clark Abraham.
Ta deseabel pa kolegio ehekutivo duna un splikashon mas amplio di e desishon. Pakiko a retirá e desishon anterior? Kiko esaki ta nifiká pa e akuerdo di kompra i eventual obligashonnan finansiero? I kua lès e kolegio ta saka for di e proseso ku a sigui? Nos ta lamentá ku ya dos luna a pasa i ainda kolegio ehekutivo no a informá pueblo kiku ta nan liña di maneho den esaki.
E tardansa aki ta lanta preguntanan i ta meresé un splikashon. E tardansa ta lanta spekulashon ku ta retené informashon deliberadamente pa limitá daño polítiko partidista. Nos ta spera di diputado Dennis Martinus bou di kua e portofolio di infrastruktura i tereno ta kai pa e por duna klaridat tokante e progreso i pa duna un desishon motivá riba petishon pa hasi e dokumentonan públiko.
Den e kuadro aki, ta relevante tambe pa tin bista den e enkargo eksakto di investigashon ku a duna na EBBEN Partners. E enkargo spesífiko aki por yuda evaluá kua preguntanan a wòrdu investigá i kua posiblemente a keda pafó di e investigashon. Kua ta e prosedura ku ta sigui ora tin pregunta tokante e posibel partisipashon di un eksdiputado den un proseso ku ta involukrá su famia, i e dokumentashon tokante un posibel dispensashon na momentu di tumamentu di desishon den Kolegio Ehekutivo ku no ta aparesé riba e lista públiko di desishonnan?
Dosié di Santa Clara ta pidi un dunamentu di kuenta kompletu i profundo tokante desishonnan tumá.
NOS TA HASI PRENSA INVESTIGATIVO PA INFORMÁ ABO.
BNN/ NOTISIA 97
RADIO FLAMINGO 97.1 FM BONAIRE
Kargando komentarionan...