Organisashon deportivo Real Rincon ta demostrá nan kompromiso no solamente riba tereno di futbòl, sino tambe den kurason di komunidat. Resientemente e klup a organisá un kampaña di limpiesa pa mantené nan bario i kaminda Broertje Janga limpi i bunita. E inisiativa aki ta sirbi komo un yamada fuerte di konsientisashon pa tur habitante i bishitante pa no tira sushi den naturalesa i pa usa e lugánan adekuá pa e propósito aki.

Carlos Pourier, presidente di Real Rincon, a enfatisá e importansia di e akshon aki, pa kual e klup ke ta un ehèmpel positivo pa hubentut, komunidat di Rincon i pa Boneiru kompleto.

Inisialmente e plan tabata pa e selekshon biaha pa Aruba, pero debí na motibunan finansiero mester a kambia di plan i opta pa Kòrsou. Presidente Carlos Pourier a duna di konosé ku, maske mester a kambia e destinashon, e meta prinsipal ta keda e mes un kos kual ta  mantené hungadónan den ritmo i na un nivel altu di kompetensia pa manera kampionato kontinuá nan ta den top kondishon kaba.

Mientrastantu, e organisashon a pasa den un periodo di reto kaminda nan no por a partisipá na torneo di 'Club Shield'. Esaki tabata debí na retonan ku faseta di lisensia i falta di sosten finansiero nesesario pa kubri gastunan di biahe.

Sinembargo, e klup a anunsiá ku tin bon notisia pa fanátikonan indikando ku e asuntu di lisensia a keda kompletamente solushoná. Esaki ta habri porta di speransa pa e klup por bolbe representá Boneiru den torneo internashonal aki den futuro, si nan logra e titulá  kampion atrobe. Pourier a konkluí ku e klup ta keda ku vishon fiho riba progreso i ku e retonan aki a sirbi pa hasi e organisashon mas fuerte pa lo ku ta bini.

Advertisement