Desaroyo polítiko i situashon rondó di formashon di koalishon i puestonan den Kolegio Ehekutivo ta sigui generá bastante reakshon i preokupashon den komunidat di Boneiru.

Robby Beukenboom, líder di partido Frente Sosial Progresivo (FSP), a kompartí su punto di bista riba e moveshonnan polítiko aktual, rendimentu di polítikonan i impakto ku instabilidat aki tin riba gobernashon di nos isla.

Segun Beukenboom, tabatin rumornan tokante un posibel formashon di gobièrnu ku e partido Demokrat huntu ku frakshon Vrolijk, sinembargo e negosashonnan no a konkretá debí na eksigensianan di Clark Abraham pa regresá komo diputado, un kondishon ku e otro partidonan no tabata dispuesto pa aseptá.

Den e konteksto aki, e debate públiko ta sigui krese tokante desishonnan ku ta keda tumá pa nos mandatarionan. Beukenboom a hasi un yamada na tur siudadano pa keda vigilante pa garantisá étika di bon gobernashon i keda bon informá riba asuntunan ku ta afektá bida di tur dia na Boneiru.

Beukenboom a deklará ku pa logra e desaroyo ku Boneiru mester, ta nesesario pa un gobièrnu keda kuater aña na mando i duna frutanan ku el primintí. E lider di FSP a enfatisá ku pueblo mester di solushon i alivio pa problemanan ku ta eksistí, utilisando rekursonan disponibel sin pèrdè tempu balioso den konfliktonan interno.

Mirando dilanti pa e próksimo elekshon, kaminda votadónan lo elegí nuebe persona pa Konseho Insular, Beukenboom a resaltá e oportunidat aki pa FSP ehekutá un "berdadero kambio.

Na final Beukenboom a konkluí ku mester duna pueblo e atenshon ku nan meresé i no laga e stulnan di poder sirbi solamente pa interes personal di un grupo chikitu. 

Advertisement