Analista polítiko William Cecilia a reakshoná riba e posishon di partido M21, tokante petishon dirigí na Minister Presidente di Hulanda. Segun Cecilia, e posishon di M21 ta mustra un falta di konosementu riba tereno konstitushonal. El a kuestioná tambe e outentisidat di e petishon, konsiderando ku no a eksistí un desishon formal di Konseho Insular tokante e asuntu.

Cecilia a indiká ku líder di M21 a hasi un interpretashon robes di e nota i deklarashonnan emití pa lider di frakshonnan. Segun e, ta importante pa mantené klaridat tokante e prosedimentunan ofisial i no basa konklushon riba interpretashon ku no ta reflehá e intenshon òf desishon formal di e instansianan kompetente.

El a agregá ku, si e situashon ta wòrdu splika den su konteksto kompleto, lo keda kla ku tin diferente interpretashon posibel tokante loke a sosodé i tokante e base di e reklamonan ku a wòrdu presentá.

Segun William Cecilia, e petishon ku a wòrdu entregá na Minister Presidente di Hulanda ta basa riba un derecho fundamental stipulá den Artíkulo 5 di e Konstitushon Hulandes, ku ta permití siudadanonan i frakshonnan polítiko dirigí petishonnan na outoridatnan sin mester aprobashon previo di henter Konseho Insular.

Cecilia a señalá ku e petishon en kuestion tabatin un eror tékniko, ya ku den e dokumento a wòrdu referí na Konseho Insular komo remitente, miéntras ku en realidat e petishon a wòrdu firmá pa diferente frakshonnan polítiko. Segun Cecilia, e firmanan mes a identifiká klaramente ku ta karta di frakshonnan respektivo i no Konseho Insular komo instituto.

El a indiká ku M21 tin tur derecho di pidi pa e tema wòrdu agregá na agenda di Konseho Insular pa deliberá i diskutí e asuntu polítikamente. Segun Cecilia, si Konseho Insular komo instituto ke asumí e petishon ofisialmente, e ta un proseso diferente ku mester pasa pa un desishon formal di e órgano mes.

Na su opinion, e diskushon aktual ta mas enfoká riba un eror atministrativo menor den e formalisashon di e dokumento, ku riba e esensia di e derecho konstitushonal di presentá un petishon na e outoridatnan kompetente.

Advertisement