Plataforma Boneiru Nobo i Mas Outónomo (PBNO) a lanta bos pa henter komunidat di Boneiru tokante un situashon ku nan ta konsiderá sumamente serio. Ta trata di e tereno agrario ku number di matrikula 4932, situá na Onima. E tereno di dies hèktar aki, ku ta keda hustamente banda di Institushon Penal Karibense (JICN) i ta e úniko plantashi komersial di aloe vera ku ta den operashon aktivo riba nos isla.

Bosero di e plataforma, Willem Cecilia, a duna detaye amplio di e desaroyo aki i a ekspresá un krítika severo kontra desishon di Entidat Públiko Boneiru (OLB). OLB su intenshon ta pa kita e tereno agrario aki for di e empresa pa despues dun'é na Ministerio di Defensa di Hulanda. E meta tras di e kambio di destinashon aki ta pa konstrukshon di un kazèrne nobo pa Koninklijke Marechaussee.

Segun Willem Cecilia i PBNO, e paso aki di gobièrnu lokal ta un gòlpi duru pa industria agríkola i sektor di kultivo na Boneiru. Cecilia ta ilustrá ku e akshon di gobièrnu riba tereno di Onima Aloe no solamente ta perhudiká un negoshi lokal ku ta operando, sino ku e ta un violashon di vários tratado internashonal ku ta protehá derechonan di un pueblo i desaroyo sostenibel di e teritorio.

Mirando e situashon aki, PBNO a tuma paso konkreto i a manda un karta di karakter sumamente urgente dirigí tantu na Konseho Insular i komo na Gezaghèber. Den e karta aki, e plataforma ta eksigí pa para e desishon di OLB di terminá e kontrato di hür di e tera agrario ku Onima Aloe NV i ehekutá un kòntròl estrikto riba esaki.

PBNO ta di opinion ku un kambio di e magnitut aki no mag di tuma lugá tras di porta será. Pa e motibu aki, nan ta insistí pa e kaso wòrdu debatí den un reunion públiko, kaminda siudadanonan di Boneiru por haña klaridat i transparensia riba kiko ta pasando ku e terenonan agrario ku ta parti di nos Isla.

Advertisement