Sindikatonan ABVO i FEDEBON a ekspresá nan preokupashon tokante oumento di tarifa ku WEB resientemente a anunsiá i implementá. Segun e dos organisashon, e subida di tarifanan ta pone mas preshon riba famia, trahadó i negoshinan na Boneiru den un tempu kaminda kosto di bida ya ta haltu.

Den un komunikado di prensa, ABVO i FEDEBON a informá ku nan a manda un karta konhunto na Kolegio Ehekutivo, pidiendo mas transparensia i informashon tokante e manera ku e tarifanan nobo a wòrdu kalkulá.

Entre e puntonan prinsipal ku e sindikatonan ta pone dilanti tin e kalkulashon i distribushon di supsidio ku WEB ta risibí. Segun nan, e supsidio mester yuda mantené e kosto pa konsumidónan na un nivel mas aseptabel, spesialmente konsiderando e kosto haltu di bida na Boneiru. Pa e motibu ei, nan ta pidi klaridat tokante kon e supsidio ta keda kalkulá, apliká i repartí.

ABVO i FEDEBON a pidi mas informashon tokante kontribushon di energia renobabel na e tarifanan aktual. Nan ta indiká ku tin falta di informashon tokante kantidat di energia ku e turbinanan di bientu a produsí durante e último seis luna i kon e produkshon aki ta influensiá kosto final pa konsumidónan.

Otro pregunta ku e sindikatonan a hasi ta e posibel partisipashon di ACM (Autoriteit Consument & Markt) den e proseso di evaluashon, asesoramentu òf kòntròl relashoná ku oumento di tarifa.

ABVO i FEDEBON ta proponé un investigashon independiente pa evaluá kalkulashon i aplikashon di e supsidio. Segun nan, un investigashon asina por kontribuí na mas transparensia i duna e komunidat un mihó bista riba kon tarifanan di utilidat ta keda determiná.

E dos organisashon a hasi un yamado na Kolegio Ehekutivo pa duna un reakshon i klaridat mas pronto posibel. Nan ta sostené ku falta di informashon tokante e oumento di tarifa ta kreá incertidumbre i ta afektá direktamente bienestar di hopi habitante di Boneiru.

ABVO i FEDEBON a indiká ku nan lo sigui monitoriá e desaroyo di e asunto i ta spera un reakshon oficial di Kolegio Ehekutivo den un futuro serka.

Advertisement