Un delegashon di Konseho Insular a bishitá BONLAB djaweps 29 di òktober pa haña informashon tokante servisionan di e laboratorio, desaroyonan di e último añanan i plannan pa futuro. Durante e bishita, e direktor a splika progreso alkansá desde ku na febrüari 2024 a tuma e desishon pa mantené i transformá e laboratorio. Tambe a trata nesesidatnan finansiero pa garantisá kontinuidat di servisionan aktual i desaroyo di servisio nobo.

BONLAB su historia ta bai bèk na 1969, ora ku e laboratorio na Boneiru tabata parti di Landslaboratorium. Na 2008, e laboratorio a bira un kompania di gobièrnu. Despues di un evaluashon di tareanan i di e servisionan na 2023, Kolegio Ehekutivo i Konseho Insular a disidí na febrüari 2024 pa mantené i transformá BONLAB.

Advertisement

Desde e desishon ei, a invertí den personal, ekipo i garantia di kalidat. BONLAB tin un ekipo di profeshonal i akadémikonan lokal. E tèstnan di salubridat públiko i awa ta akreditá. For di 1 di yanüari 2026, e laboratorio ta prepará pa duna sosten na GGD Boneiru.

BONLAB ta duna sosten na GGD den área di salubridat públiko, inkluyendo tèstnan pa malesanan infeksioso i servisionan relashoná ku salú seksual. E laboratorio ta kolaborá tambe ku RIVM (Rijksinstituut voor Volksgezondheid en Milieu) den investigashonnan preventivo di salú entre poblashon di Boneiru.

Ademas, BONLAB ta hasi investigashon di awa i ta traha riba ampliashon di su kapasidat den área di seguridat alimentario i investigashon di kalidat di airu i tera. Entre e organisashonnan ku e laboratorio ta kolaborá ku nan tin RIVM, Wageningen Food Safety Research, STINAPA i Fundashon Mariadal.

BONLAB tin plan pa sigui desaroyá su funshon komo un instituto di konosementu, kaminda resultadonan di investigashonnan lokal por keda kolektá i atministrá di forma sentral. E meta ta pa duna mihó bista di e riesgonan pa salú públiko i medioambiente, identifiká desaroyonan i evaluá e efekto di medidanan ku ta tumá.

Segun e informashon presentá durante e bishita, algun servisio nobo ta operashonal kaba, miéntras ku otro, manera monitoreo struktural di seguridat alimentario i ampliashon di investigashon di airu i tera, ainda ta den desaroyo.

Nesesidat di finansiamentu

Un otro tema ku a trata durante e bishita tabata e finansiamentu di BONLAB. E direktor a indiká ku e espasio finansiero di e laboratorio ta limitá i ku disponibilidat di medionan finansiero na tempu ta importante pa mantené e servisionan aktual.

Segun BONLAB, falta di finansiamentu na tempu por afektá e kontinuidat di e servisionan i limitá e posibilidat pa desaroyá servisio nobo. P'esei, e laboratorio ta señalá e importansia di pago na tempu, akuerdonan formal tokante e tareanan públiko i finansiamentu struktural den presupuesto di Entidat Públiko Boneiru.

Anneke Visser, direktor interino di BONLAB, a indiká ku e laboratorio ta sigui invertí den konosementu i kapasidat lokal, ku e meta pa kontribuí na salú públiko i seguridat di e poblashon.

E bishita a duna e delegashon di Konseho Insular informashon tokante funshon di BONLAB, e servisionan ku e ta ofresé i e nesesidatnan pa sigui desaroyá su aktividatnan.