Papiamentu
Dos piskadó lokal a wordu reskatá djabièrnè atardi, 30 di òktober 2026, despues ku nan boto a bòltu i sink den laman serka di 1000 Steps na Boneiru.
Segun informashon di Wardakosta di Karibe Hulandes, Sentro Operashonal Marítimo (MOC) a risibí un notifikashon via VHF kanal 16 di un boto ku a raportá e emergensia. E boto ku a raportá e insidente a intervení mesora i a logra saka e dos piskadónan for di laman. Despues, personal di Wardakosta na Boneiru a sali den direkshon di 1000 Steps pa duna asistensia.
Na yegada, personal di Wardakosta a tuma e dos piskadónan na bordo i a transportá nan bèk tera. E boto di e piskadónan a sink. Pa alertá otro barkunan den e área, MOC a emití un mensahe di atvertensia pa barkunan den besindario pa tene kuenta ku e situashon.
Wardakosta a ekspresá su danki na e tripulashon di e boto ku a intervení promé, pa nan rapides i asistensia durante di e reskate.
Kargando komentarionan...