Entidat Públiko Boneiru lo partisipá riba 4 i 5 di novèmber 2026 na kumbre di klima "Gebouwde Omgeving 2026". Durante e enkuentro, representantenan di gobièrnu, instituto di konosementu i profeshonalnan lo interkambiá konosementu i eksperensia tokante konstrukshon sostenibel, adaptashon na klima i desaroyo ku ta tene kuenta ku naturalesa.

Boneiru lo ta representá pa Carlos J.J. Pourier, konsehero di maneho di Ordenamentu Teritorial i Bibienda Popular na Entidat Públiko Boneiru.

Advertisement

E partisipashon ta dirigí riba optené konosementu tokante desaroyonan i práktikanan den konstrukshon sostenibel i desaroyo naturalesa inklusivo. E konosementu aki por sirbi komo input pa desaroyo di maneho i proyektonan riba e isla.

Durante e kumbre lo trata, entre otro, konstrukshon sostenibel, adaptashon na kambio klimatológiko, desaroyo naturalesa inklusivo i kreashon di un ambiente di biba resiliente. E enkuentro ta brinda tambe oportunidat pa establesé kontakto ku organisashonnan i ekspertonan den Reino Hulandes ku ta traha riba temanan similar.

Entidat Públiko Boneiru ta indiká ku e partisipashon ta relashoná ku e meta pa duna mas atenshon na sostenibilidat, resiliensia pa klima i konservashon di balornan natural den proyektonan di konstrukshon i desaroyo na Boneiru.

Despues di e kumbre, konosementu i eksperensianan relevante lo ser kompartí ku e organisashon i ku stakeholdernan na Boneiru. E informashon por kontribuí na evaluashon di oportunidatnan pa apliká prinsipionan di konstrukshon sostenibel i naturalesa inklusivo na Boneiru.