Ku e meta pa ofresé mas komodidat i fasilidat na su bishitantenan, Bonaire International Airport a konkluí trabounan di mehorashon na su sitio di parkeo. E proyekto no solamente a trese mas lugá di stashoná, sino tambe tabatin un enfoke riba sostenibilidat i mehorashon di e fluho di tráfiko.

Ku e ampliashon akí, a krea espasio nobo di stashoná pa públiko general i a hinka un área kompletamente separá pa empleadonan di aeropuerto. E kambio akí lo yuda redusí tráfiko durante orarionan mas drùk i ta garantisá ku tantu bishitante komo personal por stashoná mas rápido i fásil.

Aparte di e espasio, e proyekto tin energia mas limpi na kurason. Den e próksimo fase, lo bai instalá panelnan solar riba e parkerplaats. E daknan di panel solar akí lo sirbi un dòbel funshon: nan lo generá energia bèrdè pa baha emishon di karbon di aeropuerto, i na mes momento nan lo ofresé sombra pa e vehíkulonan di bishitantenan.

Un di e puntonan mas importante pa usuarionan ta asuntu di kosto. Promé ku kualke rumor por a surgi, Giordano Molina, Direktor di Bonaire International Airport (BIA), a klara i mehorá e informashon ku tarifanan di stashoná lo no subi i lo keda eksaktamente meskos. 

Finalisando Giordano Molina, Direktor di BIA a indika ku BIA ke ofresé un mihó eksperensia i servisio sostenibel na nos komunidat i bishitantenan, sin ku esei tin ku nifiká un karga finansiero mas altu pa usuario.

Ku e invershon akí, BIA ta sigui duna pasonan konkreto pa modernisá nos aeropuerto i kontribuí na un futuro mas sostenibel pa Boneiru

Advertisement