Durante un kontrol di tráfiko den oranan trempan di djabièrnè 23 di òktober, polis a los tiru i posteriormente detené un hòmber di 31 aña di edat despues ku el a apuntá un arma di kandela riba polis durante un persekushon na pia.

Segun informashon di polis, e insidente a kuminsá ora un vehíkulo ku dos okupante a keda para pa kòntròl riba Kaya Soeur Bartola. Durante e kòntròl, polis a sinti un holó di un supstansia probablemente narkótiko, loke a pone nan sigui ku un investigashon mas profundo.

Advertisement

Durante e kòntròl, e pasahero di e vehíkulo a probechá di un oportunidat pa hui. Polis a sigui su tras den un persekushon na pia. Segun e relato, durante e persekushon e sospechoso a saka un arma di kandela i a dirigí esaki riba agente di polis. Polis a reakshoná lòs tiru i a logra detené e hòmber na Kaya Gavilan.

E sospechoso, identifiká ku inisial B.R.P., tin 31 aña di edat. E shofùr di e vehíkulo, un dama di 28 aña ku inisial A.R.A., tambe a wordu detené.

Ambos sospechoso a wordu detené den konekshon ku violashon di Lei di Arma di Kandela BES.

Entrada hudisial na Kaya Aguilá

Den konekshon ku e kaso, polis a realisá un entrada hudisial na un kompleho di apartamentu na Kaya Aguilá. Durante e akshon, diferente artíkulo relevante pa e investigashon a wordu konfiská.

Segun polis, e investigashon den e kaso aki ta kontinuá.