Entidat Públiko Boneiru (OLB), den kolaborashon ku Selibon, ta organisá promé rònt di Bario Limpi 2026 for di djabièrnè 18 te ku djadumingu 20 di sèptèmber. Durante tres dia, habitantenan lo por deshasí di sushi grandi i pisá den bakinan speshal instalá den 12 bario rònt Boneiru.

E akshon tin komo meta pa fasilitá e forma korekto di deshasí di sushi, redusí dùmpmentu ilegal i kontribuí na barionan mas limpi i agradabel pa biba. E último dia di e kampaña, djadumingu 20 di sèptèmber, ta koinsidí ku World Cleanup Day (Dia Mundial di Limpiesa), un evento internashonal kaminda miónes di hende rònt mundu ta partisipá den akshonnan di limpiesa den nan komunidat.

Advertisement

“Un bario limpi ta kuminsá serka nos mes”, ta e mensahe sentral ku OLB ke transmití ku e kampaña di e aña akí. Segun e organisadónan, dùmpmentu ilegal di sushi ta sigui ta un problema ku ta afektá ambiente, salubridat i seguridat di nos barionan.

Kiko por bai den e bakinan?

E bakinan ta destiná pa sushi grandi i pisá manera:

• Muebel
• Kolchon
• Aparato bieu
• Artíkulonan di uso den kas
• Sobrá di palu
• Kantidat chikitu di sushi di kurá

Kiko NO ta permití?

No ta permití pa depositá:

• Sushi peligroso òf spesial
• Fèrf i produkto kímiko
• Produktonan di petroli
• Bateria di outo
• Asbèst
• Sushi médiko
• Kantidat grandi di bio-fertilisante
• Bòter di gas
• Kantidat grandi di sushi di konstrukshon

E tipo di materialnan akí mester ser entregá direktamente na Selibon òf na punto di rekolekshon destiná pa esaki.

Lokashonnan di e bakinan

E 12 bakinan di sushi lo ta situá na:

• Rincon – Sentro di Bario Rincon
• Tra’i Montaña – Fèlt di futbòl Tra’i Montaña
• Antriol Pabou – Kaya Gatu
• Antriol Pariba – Parke Patun Saragoza
• Amboina – Sentro di Bario Amboina
• Nikiboko Nort – Sentro di Bario Nikiboko
• Nikiboko Sùit – Parke L. Clarinda
• Tera Kòrá – Sentro di Bario Tera Kòrá
• Nort’i Saliña – Sentro di Bario Nort’i Saliña
• Belnem – Entrada di Kaya Ir. R. Statius van Eps
• Hato – Entrada di Kaya Diamanta (na Curoil Hato)
• Playa – Stadion di futbòl Playa

Yamada na komunidat

OLB ta hasi un yamada riba tur habitante pa hasi uso di bakinan den nan propio bario, mantené nan besindario limpi i no dùmp sushi den naturalesa. Segun OLB, un ambiente limpi ta kontribuí direktamente na salú, bienestar i kalidat di bida di tur residente.