Ministerio Públiko di Boneiru, Sint Eustatius i Saba (OM BES) a disidí di no habri un investigashon penal kontra eks diputado Weber. E desishon ta bin despues di un keho ku Clark Abraham i Peter Silberie a presentá riba 31 di mart 2026.

Den un karta di 22 di yüni 2026, firma pa mr. W.E. Kupers, OM ta splika ku no tin prueba ni indikashon konkreto sufisiente pa kuminsá un investigashon penal.

Advertisement

Abraham i Silberie a akusá Weber di violá sekreto di funshon, difamashon i kalumnia. E keho tabata relashoná ku informashon ku a sali den prensa tokante voto ku miembronan di Kolegio Ehekutivo (BC) a duna riba un desishon relashoná ku maneho finansiero di Boneiru.

Protekshon di fuente periodístiko

Segun OM, no ta konosí si Weber tabata e persona ku a duna e informashon na prensa. Weber a nengá ku e tabata e fuente.

Pa por komprobá esaki, lo mester investigá fuente di e informashon. Pero periodista tin derecho di protehá nan fuente, i solamente den kaso hopi eksepshonal por hasi investigashon di e tipo aki.

OM ta bisa ku e kaso aki no ta un di e situashonnan eksepshonal. P'esei, no tin base sufisiente pa sigui ku un investigashon. OM a inidiká ku no ta kla si e informashon tokante e votonan den BC tabata realmente ta informashon sekreto.

Tokante difamashon i kalumnia, OM ta bisa ku no tin indikashon ku e informashon publiká tabatin komo meta pa daña honor i bon nòmber di Abraham i Silberie.

Segun OM, miembronan di BC mester ta responsabel pa desishonnan ku nan tuma. Ademas, resultado di e desishon tabata destiná pa bira públiko. P'esei, e publikashon di kon a vota no ta nifiká automátikamente ku tin difamashon.

OM ta agregá ku, asta si por a komprobá ku Weber a duna e informashon, esaki no ta nifiká ku tin un kaso di difamashon òf kalumnia.

Den su karta, OM ta menshoná ku Abraham i Silberie a presentá e keho riba e mesun dia ku nan a entregá nan renunsia komo diputado na Konseho Insular di Boneiru, 31 di mart 2026.

OM ta referí na e situashon polítiko di e momentu i ta indiká ku derecho penal mester wordu usa solamente komo último rekurso.

Abraham i Silberie por bai Hof di Hustisia

Ku e desishon aki, OM no lo ordená un investigashon penal kontra Weber.

Sin embargo, Abraham i Silberie por protesta kontra e desishon dor di presentá un keho por eskrito na Hof di Hustisia, di akuerdo ku artíkulo 15 di Kódigo di Prosedura Penal BES.

E desishon no ta un liberashon di Weber pa medio di un hues, ni un deklarashon di inosensia. Esaki ta un desishon di Ministerio Públiko pa no sigui ku un investigashon penal basá riba e keho presentá.