Entrante 1 di ougùstùs 2026, Biblioteka Públiko Boneiru lo operá komo un entidat independiente bou di e nòmber Fundashon Biblioteka Públiko di Boneiru. E transishon ta sigui un desishon di Entidat Públiko Boneiru (OLB) pa duna e institushon mas outonomia den su organisashon i desaroyo.

Segun informashon suministrá, kambio di struktura no lo tin influensia riba servisionan diario ofresé na bishitantenan. Biblioteka ta sigui aksesibel pa tur residente di Boneiru i lo kontinuá ofresé su kolekshon di buki, programa edukativo, aktividat kultural i otro servisionan na Papiamentu, Spañó, Ingles i Hulandes.

Ku e transishon aki, a instalá un Konseho di Supervishon nobo pa supervisá e fundashon. E konseho ta konsistí di Pierre Perigault Monte komo presidente, huntu ku Judith Brekelmans, Willemijn Hessels, Esther Meijer-Sedney i Richard Wiegers komo miembronan.

Direktor di biblioteka, Jennifer Pocornie-Martis, a indiká ku e transishon ta representá un paso importante den desaroyo kontinuo di e institushon. Segun e, biblioteka ta sigui enfoká riba su ròl komo un espasio di enkuentro, lesamentu, edukashon i desaroyo personal pa mucha, hóben i adulto.

Fundashon Biblioteka Públiko di Boneiru ta deklará ku e lo kontinuá traha pa promové lesamentu, edukashon i partisipashon kultural den komunidat, manteniendo e biblioteka komo un punto sentral pa konosementu i enkuentro na Boneiru.

Advertisement