Boneiru a risibí 13.701 bishitante stayover durante ougùstùs 2026, segun sifranan preliminar ku Tourism Corporation Bonaire (TCB) a publiká. E kantidat ta 5% ménos kompará ku ougùstùs 2025, ora ku 14.435 bishitante a yega na Boneiru. Bishitantenan for di Hulanda tabata e grupo mas grandi, ku 6.114 yegada, òf 44,6% di e total. Merka tabata e di dos merkado mas grandi, ku 3.738 bishitante, òf 27,3%.

Kòrsou tabata e di tres pais ku mas bishitante, ku 1.591 yegada, representando 11,6% di e total. Esaki a keda sigui pa Alemania ku 309 bishitante (2,3%), Aruba ku 268 (2%), Italia ku 172 (1,3%), Bélgika ku 159 (1,2%), Colombia ku 149 (1,1%), Canada ku 126 (0,9%), Argentina ku 123 (0,9%) i Brazil ku 117 (0,9%).

Advertisement

Bishitantenan for di Merka

Segun sifranan di TCB, mayoria di e bishitantenan for di Merka a biaha ku un partner, siguí pa bishitantenan ku a biaha nan so. E motibu prinsipal pa bishitá Boneiru tabata fakansi, ku 50,6% di bishitantenan. Esaki tabata sigui pa sambuyadó ku 36,2% i bishita di amigu i famia ku 2,5%.

Den término di akomodashon, 57,4% di e bishitantenan for di Merka a hospedá den un hotèl. Un vila tabata e opshon pa 13%, apartamento pa 6,5%, nan propio bibienda pa 5,1% i serka un miembro di famia pa 3,6%. Bishitantenan for di Merka a bini prinsipalmente for di Florida, Texas, New York, North Carolina i California. Grupo di edat di 55 pa 64 aña tabata e segmento mas grandi, ku 21,3% di bishitantenan, sigui pa grupo di 45 pa 54 aña ku 19,4%.

Bishitantenan for di Hulanda

Entre bishitantenan for di Hulanda, mayoria a biaha nan so, sigui pa famianan ku yu. Fakansi tabata e motibu prinsipal pa e bishitanan, ku 72,6%. Bishita di amigu i famia tabata representá 8%, miéntras ku 5,7% a bini pa motibunan di negoshi. Hotèl tabata e tipo di akomodashon mas komun, ku 50,6% di e bishitantenan hulandes. Apartamentonan tabata representá 14,4%, vilanan 8,4%, hospedá serka un miembro di famia 8,3% i propio bibienda 4,3%.

Mayoria di e bishitantenan hulandes a bini for di Zuid-Holland, Noord-Holland, Gelderland, Noord-Brabant i Utrecht. Den e grupo aki, bishitantenan di 45 pa 54 aña tabata representá 18,3%, miéntras ku grupo di 18 pa 24 aña tabata representá 16,3%.

TCB ta indiká ku e sifranan pa ougùstùs 2026 ta preliminar.