Habitantenan di Boneiru ta paga un di e tarifanan di elektrisidat mas haltu na mundu. Segun e tarifa aktual di Pagabon, for di yüli 2026 konsumidónan ta paga US$0.6642 pa kada kilowatt-ora (kWh), loke ta pone Boneiru riba hopi pais ku tradishonalmente ta konosí pa nan preisnan haltu di energia, manera Alemania, Irlanda, Bélgika i Hulanda.

E subida di tarifa ta trese preokupashon entre famia i negoshinan lokal ku ya ta sinti preshon di kosto di bida ku ta sigui subi. Pa un famia ku ta konsumí 500 kWh pa luna, solamente e kosto di elektrisidat por pasa US$330, sin konta otro gastu adishonal.

Advertisement

Boneiru kompará ku otro Pais

Komparashonnan internashonal ta mustra ku solamente un algun pais ta yega serka di e preisnan di Boneiru. Entre e ekonomianan mas grandi, Irlanda, Alemania, Bélgika i Italia ta konta entre e paisnan ku e elektrisidat mas karu.

Boneiru tin un tarifa di elektrisidat di aproksimadamente US$0.664 pa kWh ku e sistema Pagabon prepaid i e tarifa regular ta aproksimadamente US$0.502 pa kWh

Saba ta sigui ku un tarifa di US$0.550 pa kWh.

Na Bermuda, e preis ta rònt di US$0.465 pa kWh.

Irlanda ta tin un tarifa di aproksimadamente US$0.450 pa kWh.

Italia i Alemania ta paga US$0.410 pa kWh.

Na Bélgika, e tarifa ta aproksimadamente US$0.400 pa kWh, mientras ku na Reino Uní e ta US$0.400.

Hulanda tin un tarifa konsiderablemente mas abou, di aproksimadamente US$0.280 pa kWh.

Esaki ta mustra ku ku tarifa Pagabon di US$0.664 pa kWh, Boneiru ta situá entre e lugánan ku elektrisidat mas karu na mundu.

Pakiko asina karu?

Preis haltu di elektrisidat na Boneiru ta relashoná prinsipalmente ku kosto di kombustibel i reto pa manehá un ret di energia aislá riba un isla chikí. Islanan ku no ta konektá na retnan grandi di energia generalmente mester dependé mas riba importashon di kombustibel, loke ta resultá den preisnan hopi mas haltu ku na paisnan ku retnan interkonektá.

Elektrisidat mas baratu na mundu

Na e otro banda di e lista ta Iran, ku aktualmente tin e preis di elektrisidat residensial mas abou den mundu: aproksimadamente US$0.003 pa kWh. Esaki ta posibel pa motibu di subsidionan gubernamental amplio i abundansia di petroleo i gas natural lokal.

Otro paisnan ku preisnan masha abou di elektrisidat ta inkluí Etiopia, Kirguistán, Irak, Angola i Egipto. E diferensia ta impreshonante; un residente na Boneiru ku ta paga segun e tarifa Pagabon, ta paga mas ku 220 biaha mas pa kada unidat di elektrisidat ku un kas na Iran

Konseho Insular ke intervenshon

Den reunion di 1 di sèptèmber, Konseho Insular di Boneiru a aprobá un moshon ku ta pidi pa aloká fondo pa kompensá e subida den tarifa di koriente. Segun e propuesta, ta trata di un suma di aproksimadamente 6 miyon dòler ku lo mester yuda residente i negoshinan ku e kosto adishonal di energia te fin di desèmber 2026.

Sinembargo, e medida ainda no ta definitivamente implementá. Awor lo mester evaluá di unda e fondo lo bini, kon e kompensashon lo keda distribuí i kua grupo lo kalifiká pa asistensia. Te ku awor no tin un fecha ofisial ni un plan final pa ehekutá e moshon, i pa motibu ei hopi residente ta sigui warda riba klaridat tokante e posibilidat di yega na un alivio finansiero.